موٹروے ایم فائیو پر تیز رفتاری دو گاڑیوں کے ڈرائیورز گرفتار ایف آئی آر درج

گرفتار ڈرائیورز میں ایک کا تعلق لاہور جبکہ دوسرے کا گھوٹکی سے ہے

تیز رفتاری کے خلاف کارروائیاں جاری رہیں گی سیکٹر کمانڈر ایس پی رانا سرفراز ناصر

  اوچ شریف (کرائم رپورٹر) موٹروے ایم فائیو پر تیز رفتاری کے خلاف کریک ڈاؤن جاری ہے، جس کے تحت مزید دو گاڑیوں کے ڈرائیورز کے خلاف ایف آئی آر درج کرکے انہیں گرفتار کر لیا گیا۔ تیز رفتاری کے یہ واقعات شجاع آباد کے قریب بیٹ 23 میں پیش آئے، جہاں دو گاڑیاں مقررہ حد رفتار 120 کلومیٹر فی گھنٹہ سے تجاوز کرکے 154 اور 150 کلومیٹر فی گھنٹہ کی رفتار سے سفر کر رہی تھیں۔

 تفصیلات کے مطابق، انسپکٹر جنرل نیشنل ہائی ویز اینڈ موٹروے پولیس رفعت مختار راجہ، زونل کمانڈر دار علی خٹک اور سیکٹر کمانڈر ایس پی رانا سرفراز ناصر کی ہدایات پر اوور سپیڈ گاڑیوں کے خلاف سخت کارروائی کی جا رہی ہے۔ جدید انٹیلی جینس سسٹم (ITS) کے ذریعے ان گاڑیوں کی نشاندہی کی گئی، جس کے بعد انسپکٹر عامر سردار اور ٹائیگر-3 کے افسران نے شجاع آباد انٹرچینج کے قریب انہیں روک کر ڈرائیورز کو حراست میں لے لیا۔ گرفتار ڈرائیورز میں ایک کا تعلق لاہور جبکہ دوسرے کا گھوٹکی سے ہے۔موٹروے پولیس کے مطابق، تیز رفتاری کے خلاف کارروائیاں جاری رہیں گی اور 150 کلومیٹر فی گھنٹہ سے زیادہ رفتار کی حامل گاڑیوں کے خلاف بھاری جرمانوں کے ساتھ ساتھ مقدمات کا اندراج بھی کیا جائے گا۔ سیکٹر کمانڈر ایس پی رانا سرفراز ناصر نے کہا کہ تیز رفتاری سے ہونے والے حادثات کی روک تھام کے لیے سخت اقدامات کیے جا رہے ہیں تاکہ شاہراہوں پر محفوظ سفر کو یقینی بنایا جا سکے