طارق بشیر چیمہ کی قیادت میں تھانہ روڈ اور پوسٹ آفس روڈ کی تعمیر آخری مراحل میں ہے حسن عسکری شیخ

میں نے تھانہ روڈ پر کارپٹنگ کرنے کا افتتاح کر دیا ہے اور یہ سڑکیں رواں ہفتے میں ہی عوام کے لئے کھول دی جائیں گی صوبائی پارلیمانی سیکرٹری کی گفتگو

چنی گوٹھ (نامہ نگار) صوبائی پارلیمانی سیکرٹری پنجاب و ایم پی اے حسن عسکری شیخ نے کہا ہے کہ سابق وفاقی وزیر و ایم این اے چوہدری طارق بشیر چیمہ کی قیادت میں تھانہ روڈ اور پوسٹ آفس روڈ کی تعمیر آخری مراحل میں ہے ، 8 کروڑ روپے کی لاگت سے سڑکوں کی تعمیر کا کام جاری ہے ، ان خیالات کا اظہار انہوں نے گزشتہ روز سابق چیئرمین یونین کونسل چنی گوٹھ مہر محمد صدیق اور معززین علاقہ کے ہمراہ صحافیوں سے گفتگو کرتے ہوئے کیا ، انہوں نے کہا کہ میں نے تھانہ روڈ پر کارپٹنگ کرنے کا افتتاح کر دیا ہے اور یہ سڑکیں رواں ہفتے میں ہی عوام کے لئے کھول دی جائیں گی ، انہوں نے بتایا کہ پوسٹ آفس روڈ کے دونوں اطراف نکاسی آب کے لئے نالے بنائے جائیں گے، سٹریٹ لائٹس اور سڑکوں پر پلانٹیشن بھی کی جائے گی ،

ایم پی اے حسن عسکری شیخ نے کہا کہ سڑکوں کی تعمیر کرپشن سے پاک معیاری کام کیا جا رہا ہے اور کمیشن مافیا کا داخلہ مکمل طور پر بند ہے ، انہوں نے کہا کہ اب وعدے نہیں بس کام ہوں گے ، سابقہ عوامی نمائندوں نے چنی گوٹھ کی جانب کوئی توجہ نہیں دی جس کی وجہ سے یہ علاقہ پسماندگی کی دلدل میں چلا گیا ، انہوں نے کہا کہ مزید اٹھارہ پختہ سڑکوں کی تعمیر کا کام بھی جاری ہے اور وہ بھی آخری مراحل میں داخل ہو چکی ہیں ۔ اس موقع پر چوہدری اعظم علی پٹواری ، جام سعید لاڑ ، طارق خان عباسی ، سردار غازی خان پٹھان ،راؤ رضوان علی ، سردار شریف خان لبانہ ، چوہدری منشاء گجر ، چوہدری عبدالغفار آرائیں ، رانا ساجد غفار ، چوہدری عمر سعید ، رانا محمد حسین ، ملک صفدر علی ، ملک ساجد علی ، سجاد خان عباسی نمبردار ، ملک محمد رمضان آرائیں ، محمد افضل پنوار اور دیگر شامل تھے ۔