چوہدری طارق بشیر چیمہ کی احمد پور شرقیہ کو ضلع بنانے کے مطالبے کی حمایت کا اعلان
ضلع بناؤ ایکشن کمیٹی کے چیئرمین ڈاکٹر فیاض محمود اعوان کی رکن قومی اسمبلی چوہدری طارق بشیر چیمہ سے ملاقات
احمد پور شرقیہ کی عوام کے جائز مطالبے کو متعلقہ حکام تک بھرپور انداز میں پہنچایا جائے گا رکن قومی اسمبلی چوہدری طارق بشیر چیمہ
بہاولپور : احمد پور شرقیہ کو ضلع بنانے کے مطالبے پر چوہدری طارق بشیر چیمہ کی حمایت احمد پور ضلع بناؤ ایکشن کمیٹی کے چیئرمین ڈاکٹر فیاض محمود اعوان نے سابق وفاقی وزیر و موجودہ رکن قومی اسمبلی چوہدری طارق بشیر چیمہ سے ملاقات کی۔ ملاقات کے دوران احمد پور شرقیہ کو ضلع کا درجہ دلوانے کے حوالے سے تفصیلی تبادلۂ خیال کیا گیا۔ اس موقع پر دونوں رہنماؤں نے اس بات پر اتفاق کیا کہ احمد پور شرقیہ آبادی، رقبے، انتظامی ضروریات اور عوامی سہولتوں کے پیش نظر ضلع بننے کا مکمل حق رکھتا ہے۔
انہوں نے کہا کہ احمد پور شرقیہ کو ضلع کا درجہ دینا وقت کی اہم ضرورت ہے تاکہ عوام کو سرکاری خدمات ان کی دہلیز پر میسر آسکیں اور علاقے کی ترقی کا عمل مزید تیز ہو۔ ڈاکٹر فیاض محمود اعوان نے چوہدری طارق بشیر چیمہ کو احمد پور ضلع بناؤ ایکشن کمیٹی کی جانب سے جاری عوامی مہم اور مختلف طبقات کی حمایت سے آگاہ کیا۔ انہوں نے مطالبہ کیا کہ وفاقی اور صوبائی سطح پر اس دیرینہ مسئلے کے حل کے لیے مؤثر کردار ادا کیا جائے۔
چوہدری طارق بشیر چیمہ نے کہا کہ احمد پور شرقیہ کی عوام کے جائز مطالبے کو متعلقہ حکام تک بھرپور انداز میں پہنچایا جائے گا اور وہ اس مسئلے کے حل کے لیے ہر ممکن تعاون کریں گے۔ انہوں نے کہا کہ انتظامی بنیادوں پر نئے اضلاع کا قیام عوامی مفاد میں ہے اور احمد پور شرقیہ اس حوالے سے تمام ضروری تقاضے پورے کرتا ہے۔ ملاقات کے اختتام پر دونوں رہنماؤں نے اس عزم کا اظہار کیا کہ احمد پور شرقیہ کو ضلع کا درجہ دلوانے کے لیے مشترکہ کوششیں جاری رکھی جائیں گی تاکہ عوام کی دیرینہ خواہش جلد از جلد پوری ہو سکے۔