لندن سے آئے سینئر صحافی فیضان عارف کا بہاولپور میں صحافی دوستوں کے اعزاز میں عشائیہ
اخبار جہاں لندن کے نمائندہ خصوصی نے مقامی ہوٹل میں ادبی و صحافتی شخصیات سے ملاقات کی، نواب صادق محمد خان عباسی اور عباسی حکمرانوں کی تاریخ پر کتاب لکھنے کے ارادے کا اظہار
بہاولپور (نوائےاحمد پور شرقیہ رپورٹ)
اخبار جہاں میگزین لندن کے پاکستان کے لیے نمائندہ خصوصی فیضان عارف، جو بہاولپور کے کہنہ مشق صحافی، ادیب اور شاعر ہیں، چند روز قبل برطانیہ سے بہاولپور پہنچے۔ انہوں نے گزشتہ شب مقامی ہوٹل میں اپنے صحافی دوستوں سے ملاقات کے لیے ایک نشست کا اہتمام کیا اور شرکاء کے اعزاز میں پرتکلف عشائیہ بھی دیا۔ تقریب میں بہاولپور اور گردونواح کے نمایاں صحافتی و ادبی شخصیات نے شرکت کی۔
بہاولپور: دائیں سے بائیں، ایڈیٹر اِن چیف روزنامہ ستلج فضل حمید احمد، نمائندہ روزنامہ ڈان مجید گل، ایڈیٹر اِن چیف روزنامہ نوائے احمد پور شرقیہ احسان احمد سحر اور ایڈیٹر اِن چیف پندرہ روزہ حقیقت سعید احمد کی لندن میں مقیم صحافی فیضان عارف کی جانب سے مقامی ہوٹل میں دیے گئے عشائیے کے موقع پر لی گئی تصویر
تقریب میں شریک ہونے والی نمایاں شخصیات
- مجید گل، نمائندہ روزنامہ ڈان، بہاولپور
- فضل حمید احمد، ایڈیٹر اِن چیف، روزنامہ ستلج، بہاولپور
- سعید احمد، ایڈیٹر، پندرہ روزہ حقیقت، بہاولپور
- مجید ہاشمی، ایڈیٹر، روزنامہ مشعل، بہاولپور
- پروفیسر ڈاکٹر شہزاد رانا، سابق چیئرمین، شعبہ ابلاغیات، اسلامیہ یونیورسٹی بہاولپور
- سجاد پرویز، کنٹرولر نیوز، ریڈیو پاکستان لاہور
- ڈاکٹر محمد ندیم، ایڈیٹر، روزنامہ صادق الاخبار، بہاولپور
- احسان احمد سحر، ایڈیٹر اِن چیف، روزنامہ نوائے احمد پور شرقیہ، بہاولپور
- افتخار احمد علوی، سرپرست اعلیٰ، پریس کلب سما ستہ
- مبشر وسیم لودھی، سینئر صحافی، لودھراں
- فضل محمود، ریٹائرڈ افسر، ڈائریکٹوریٹ تعلقات عامہ، بہاولپور
- خلیل سید، ریڈیو پاکستان بہاولپور
ان کے علاوہ دیگر سینئر صحافیوں نے بھی تقریب میں شرکت کی۔
بہاولپور: میزبان فیضان عارف کے ساتھ ایڈیٹر اِن چیف روزنامہ نوائے احمد پور شرقیہ احسان احمد سحر اور سرپرست اعلیٰ پریس کلب سمہ سٹہ افتخار احمد علوی عشائیے کی تقریب میں موجود ہیں
میزبان فیضان عارف کا تعارف
فیضان عارف اخبار جہاں میگزین لندن کے پاکستان کے لیے نمائندہ خصوصی ہیں۔ وہ جنوری انیس سو نواسی سے دسمبر انیس سو ترانوے تک بہاولپور میں روزنامہ جنگ کے نمائندے رہے۔ اس کے بعد جنوری انیس سو چورانوے سے دو ہزار ایک تک وہ جنگ انٹرنیشنل لندن سے میگزین کے سب ایڈیٹر اور اسسٹنٹ ایڈیٹر کے طور پر وابستہ رہے۔ برسوں قبل لندن منتقل ہونے کے بعد انہوں نے نہ صرف ادبی محافل کو سجائے رکھا بلکہ صحافتی میدان میں بھی اپنا تعارف برقرار رکھا۔
عباسی حکمرانوں کی تاریخ پر کتاب لکھنے کا ارادہ
روزنامہ نوائے احمد پور شرقیہ کے ایڈیٹر اِن چیف احسان احمد سحر سے گفتگو کرتے ہوئے لندن میں مقیم سینئر صحافی فیضان عارف نے انکشاف کیا کہ وہ سابق فرمانروائے ریاست بہاولپور نواب صادق محمد خان عباسی اور دیگر عباسی حکمرانوں کے برطانوی شاہی خاندان کے ساتھ تعلقات کے موضوع پر ایک کتاب تحریر کریں گے۔ انہوں نے بتایا کہ اس مقصد کے لیے وہ لندن میں انڈیا آفس لائبریری کا باقاعدگی سے دورہ کر رہے ہیں تاکہ سن انیس سو سینتالیس سے قبل ریاست بہاولپور اور برطانوی ہند حکومت کے درمیان تعلقات کی پرانی تاریخ کو محفوظ کیا جا سکے۔