چنی گوٹھ میں آڑھتی مہر عابد حسین پر فائرنگ دو ڈاکو ایک کروڑ 31 لاکھ روپے چھین کر فرار

چنی گوٹھ (نامہ نگار)دو مسلح ڈاکوؤں نے مزاحمت کرنے پر آڑھتی کو فائرنگ کرکے شدید زخمی کر دیا اور نقدی تقریباً 1کروڑ 31 لاکھ روپے لوٹ کر فرار ہو گئے ۔ تفصیل کے مطابق چنی گوٹھ کے آڑھتی مہر عابد حسین اپنی کار پر کیش لے کر چنی گوٹھ سے اوچشریف جا رہا تھا کہ کوٹ خلیفہ روڈ پر بستی عاشق آباد کے قریب دو مسلح موٹر سائیکل سوار ڈاکوؤں نے اسلحہ کی نوک پر اس کو روک لیا ۔ ڈاکوؤں نے کیش لوٹنے کی کوشش کی تو مہر عابد حسین نے مزاحمت کر دی جس پر ڈاکوؤں نے اس کو فائرنگ کرکے شدید زخمی کر دیا اور نقدی مبلغ تقریباً ایک کروڑ 31 لاکھ روپے لوٹ کر فرار ہو گئے ۔ اطلاع ملنے پر چنی گوٹھ پولیس جائے وقوعہ پر پہنچ گئی ،زخمی کو ہسپتال منتقل کیا گیا اور ڈاکوؤں کی تلاش شروع کردی ہے ۔