آر ایم این پی کی جانب سے صادق پریس فریڈم کیش ایوارڈز سید اظہر علی رضوی اور مرحوم سید سرفراز حسین زیدی کو پیش

عالمی یومِ آزادیٔ صحافت پر احمدپور شرقیہ میں راؤنڈ ٹیبل کانفرنس؛ آزادیٔ صحافت اور اظہارِ رائے کے فروغ میں خدمات پر صحافیوں کو خراجِ تحسین

رورل میڈیا نیٹ ورک پاکستان (آر ایم این پی) نے اپنے موقر ’’آر ایم این پی صادق پریس فریڈم کیش ایوارڈز‘‘ سینئر صحافی سید اظہر علی رضوی اور  صحافی سید سرفراز حسین زیدی کو  بعد از وفات   جنوبی پنجاب میں مشکل اور ناموافق حالات کے باوجود آزادیٔ صحافت کے دفاع اور آزادیٔ اظہار کے فروغ کے لیے ان کی نمایاں خدمات کے اعتراف میں پیش کیے۔

ایوارڈ تقریب عالمی یومِ آزادیٔ صحافت کے موقع پر 3 مئی کو پنجاب کالج احمدپور شرقیہ میں منعقدہ ایک خصوصی راؤنڈ ٹیبل کانفرنس کے دوران منعقد کی گئی۔

رواں سال کے آر ایم این پی صادق پریس فریڈم کیش ایوارڈز کی اسپانسرشپ ڈیجیٹل ڈیلی نوائے احمدپور شرقیہ اور احمدپور یونین آف جرنلسٹس ورکرز (اے یو جے ڈبلیو) نے کی۔

تقریب کی صدارت آر ایم این پی کے صدر احسان احمد سحر نے کی۔ سینئر سیاسی رہنما اور سابق رکن پنجاب اسمبلی قاضی عدنان فرید نے کلیدی خطاب کیا، جبکہ پاکستان مسلم لیگ (فنکشنل) پنجاب کے سینئر نائب صدر مخدوم سید  ناصر حسین بخاری مہمانِ  مقرر کے طور پر شریک ہوئے۔

تقریب میں بہاولپور اور رحیم یار خان اضلاع کے پانچ پریس کلبوں کے نمائندگان، صحافتی تنظیموں کے قائدین، ماہرین تعلیم، پرنٹ، الیکٹرانک اور ڈیجیٹل میڈیا سے وابستہ افراد اور آزادیٔ صحافت کے علمبرداروں نے شرکت کی۔

آر ایم این پی جیوری کے فیصلے کے مطابق ’’آر ایم این پی صادق پریس فریڈم ایوارڈ‘‘ بعد از وفات احمدپور یونین آف جرنلسٹس ورکرز کے سابق صدر مرحوم سید سرفراز حسین زیدی کو دیا گیا، جو روزنامہ کائنات کے بیورو چیف بھی رہے۔ وہ احمدپور شرقیہ اور ضلع بہاولپور کے ملحقہ علاقوں میں آزادیٔ صحافت کے نمایاں علمبردار تھے۔ اپنی صحافتی زندگی کے دوران انہوں نے صحافیوں کے حقوق اور فلاح و بہبود کے لیے مسلسل جدوجہد کی اور احمدپور پریس کلب اور اے یو جے ڈبلیو کے سرپرست بھی رہے۔

سید سرفراز حسین زیدی مرحوم کا آر ایم این پی صادق پریس فریڈم کیش ایوارڈ اُنکے صاحبزادے سید اویس زیدی نے وصول کیا

اسی طرح پریس کلب اوچ شریف کے صدر، روزنامہ ایکسپریس کے نمائندہ سید اظہر علی رضوی کو کیٹیگری-سی میں آر ایم این پی صادق پریس فریڈم کیش ایوارڈ سے نوازا گیا۔

آر ایم این پی جیوری نے 2011 میں اوچ شریف میں پریس فریڈم مانیٹرنگ کمیٹی کے قیام میں ان کے نمایاں کردار کو سراہا، جو ایک مذہبی لحاظ سے حساس علاقہ ہے جہاں آزاد صحافت کو اکثر شدید دباؤ کا سامنا رہتا ہے۔ انہوں نے آر ایم این پی، یونیسکو اور دوحہ سینٹر فار میڈیا فریڈم کے اشتراک سے منعقدہ صحافیوں کی حفاظت اور پیشہ ورانہ تربیت کے متعدد پروگراموں میں بطور کوآرڈینیٹر خدمات بھی انجام دیں۔

ان پروگراموں میں شامل ہیں:

آر ایم این پی۔یونیسکو جرنلسٹس سیفٹی ٹریننگ ورکشاپ (2011)

آر ایم این پی۔یونیسکو بیسک جرنلزم ٹریننگ ورکشاپ (2012)

آر ایم این پی۔ڈی سی ایم ایف جرنلسٹس سیفٹی ٹریننگ ورکشاپ (2018)

سید اظہر علی رضوی کی ذاتی کاوشوں کے باعث اوچ شریف کے صحافیوں نے ان تربیتی پروگراموں میں بھرپور شرکت کی اور بعد ازاں آر ایم این پی کی میڈیا ڈویلپمنٹ اور آزادیٔ صحافت کی سرگرمیوں میں بھی شامل ہوئے۔ ان پروگراموں میں اوچ شریف سے خواتین صحافیوں کی شمولیت کو ایک اہم کامیابی قرار دیا گیا۔

آر ایم این پی صادق پریس فریڈم ایوارڈ کا اجراء 2005 میں کیا گیا تھا، جس کا مقصد پاکستان میں میڈیا کی آزادی کے لیے کام کرنے والے صحافیوں اور میڈیا اداروں کی جرات، وابستگی اور قربانیوں کو تسلیم کرنا ہے۔ یہ ایوارڈ ملک میں آزادیٔ صحافت اور اظہارِ رائے کی صورتحال کی جانب قومی اور بین الاقوامی توجہ مبذول کرانے کا ذریعہ بھی ہے۔

مزید تفصیلات کے لیے وزٹ کریں:
https://ruralmedianetworkpk.org/

دریں اثنا، ڈیجیٹل ڈیلی نوائے احمدپور شرقیہ نے اپنی جانب سے ’’مظہر رشید بہترین کمیونٹی رپورٹنگ ایوارڈ‘‘ اوچ پریس کلب اینڈ میڈیا گروپ کے چیف آرگنائزر ارشاد احمد شاد کو نچلی سطح کی صحافت اور کمیونٹی رپورٹنگ میں ان کی خدمات کے اعتراف میں پیش کیا۔

ایوارڈ شیلڈ پریس کلب چنی گوٹھ کے صدر شاہد بشیر چوہدری نے پیش کی، جبکہ آر ایم این پی کے صدر احسان احمد سحر نے باضابطہ طور پر اوچ شریف پریس اینڈ میڈیا کلب کی رجسٹریشن کا سرٹیفکیٹ اس کے سی ای او ارشاد احمد شاد کے حوالے کیا۔ یہ سرٹیفکیٹ سیکیورٹیز اینڈ ایکسچینج کمیشن آف پاکستان (ایس ای سی پی) کی جانب سے جاری کیا گیا تھا۔