صوبائی پارلیمانی سیکرٹری حسن عسکری شیخ کی عارف عزیز شیخ سے ان کے فارم ہاؤس پر ملاقات

طارق بشیر چیمہ کی قیادت میں حلقہ میں اب تک تقریباً دو ارب روپے کی لاگت سے مختلف ترقیاتی منصوبوں پر کام تیزی سے جاری ہے صوبائی پارلیمانی سیکرٹری

عارف عزیز شیخ نے حسن عسکری شیخ کی کاوشوں کو سراہتے ہوئے کہا کہ  ترقیاتی منصوبوں میں شفافیت اور معیار کو یقینی بنایا جائے تاکہ ان کے ثمرات عام شہری تک پہنچ سکیں 

   چنی گوٹھ (نامہ نگار) صوبائی پارلیمانی سیکرٹری پنجاب و ایم پی اے حلقہ پی پی 248 حسن عسکری شیخ نے سابق چیئرمین یونین کونسل چنی گوٹھ مہر محمد صدیق کے ہمراہ سابق ایم این اے عارف عزیز شیخ سے ان کے فارم ہاؤس پر ملاقات کی۔ ملاقات کے دوران حلقے کی مجموعی ترقی، جاری اور آئندہ ترقیاتی منصوبوں، عوامی مسائل اور سہولیات کی فراہمی پر تفصیلی تبادلہ خیال کیا گیا۔

اس موقع پر ایم پی اے حسن عسکری شیخ نے سابق ایم این اے عارف عزیز شیخ کو آگاہ کیا کہ سابق وفاقی وزیر و ایم این اے چوہدری طارق بشیر چیمہ کی قیادت میں حلقہ میں اب تک تقریباً دو ارب روپے کی لاگت سے مختلف ترقیاتی منصوبوں پر کام تیزی سے جاری ہے۔ ان منصوبوں میں سڑکوں اور پلوں کی تعمیر و مرمت، ٹف ٹائل، سولنگ اور دو سو کے قریب نئی بستیوں میں بجلی کی فراہمی شامل ہے، جس سے عوام کو بنیادی سہولیات کی فراہمی ممکن ہو سکے گی۔انہوں نے مزید بتایا کہ عوام کی دیرینہ ضرورت کے پیش نظر تقریباً 47 کروڑ روپے کی خطیر رقم سے ٹوٹی ہوئی سڑکوں کی تعمیر و مرمت  کے بڑے منصوبوں پر بھی جلد کام شروع کیا جا رہا ہے، جس سے علاقے میں آمد و رفت کے مسائل میں نمایاں کمی آئے گی اور معاشی سرگرمیوں کو فروغ ملے گا۔

سابق ایم این اے عارف عزیز شیخ نے ایم پی اے حسن عسکری شیخ کی کاوشوں کو سراہتے ہوئے کہا کہ عوامی نمائندوں کی اولین ذمہ داری عوام کو زیادہ سے زیادہ ریلیف فراہم کرنا ہے۔ انہوں نے زور دیا کہ ترقیاتی منصوبوں میں شفافیت اور معیار کو یقینی بنایا جائے تاکہ ان کے ثمرات عام شہری تک پہنچ سکیں۔ ملاقات خوشگوار ماحول میں اختتام پذیر ہوئی