صوبائی وزیر اقلیتی امور سردار رمیش سنگھ اروڑہ کی یزمان میں ہولی کی تقریب میں شرکت

صوبائی وزیر نے ہولی کی خوشی میں حکومت پنجاب کی جانب سے 15 ہزار روپے فی گھرانہ چیک تقسیم کئے

بہاول پور:15/ مارچ: صوبائی وزیر اقلیتی امور سردار رمیش سنگھ اروڑہ نے پاکستان سمیت دنیا بھر کی ہندو برادری کی ہولی کے تہوارکی مناسبت سے 98 ڈی این بی یزمان کے علاقہ میں منعقدہ تقریب میں شرکت کی۔ تقریب میں ہندو برادری نے ہولی کی خوشیاں منائیں اور اپنے روایتی انداز میں رنگوں سے کھیل کر اس تہوار کا لطف اٹھایا۔صوبائی وزیر اقلیتی امور سردار رمیش سنگھ اروڑہ ہندو برادری کے ساتھ خوشیوں میں شریک ہوئے اور انہوں نے کیک بھی کاٹا۔

صوبائی وزیر اقلیتی امور نے اپنے خطاب میں کہا کہ پنجاب حکومت اقلیتوں کے حقوق کا تحفظ یقینی بنا رہی ہے۔ انہوں نے کہا کہ ہندو برادری کے مذہبی حقوق کی پاسداری کے لیے ہر ممکن اقدامات کیے جا رہے ہیں۔ انہوں نے کہا کہ وزیر اعلیٰ پنجاب مریم نواز کی کاوشوں سے اقلیتی برادری کی فلاح و بہبود کے لئے متعدد منصوبوں پر کام جاری ہے۔صوبائی وزیر نے ہولی کی خوشی میں حکومت پنجاب کی جانب سے 15 ہزار روپے فی گھرانہ چیک تقسیم کئے اور ہندو کمیونٹی کو یقین دلایا کہ اقلیتی برادری کی جانب سے پیش کئے گئے مسائل ترجیحی بنیادوں پر حل کئے جائیں گے۔اس موقع پر چاند کمار،لالہ اکمل لال بھیل، گوپال رام، امر لال، راجو لال، بابر لال سمیت ہندو کمیونٹی کے دیگر افراد بھی موجود تھے۔