نئے آر پی او غازی محمد صلاح الدین کی ترجیحات

اداریہ —– 7 دسمبر2025

بہاولپور ریجن میں نئے ریجنل پولیس آفیسر غازی محمد صلاح الدین کی آمد کے بعد پولیس انتظامیہ میں ایک نئی حرکیات جنم لیتی نظر آرہی ہے۔ آر پی او آفس میں منعقدہ اہم اجلاس میں تینوں اضلاع کے ڈی پی اوز اور متعلقہ اعلیٰ افسران کی بھرپور شرکت اس بات کی علامت ہے کہ نئی قیادت ریجن میں امن و امان کے نظام کو مؤثر انداز میں آگے بڑھانے کی خواہش رکھتی ہے۔

اجلاس میں جن نکات پر زور دیا گیا، وہ آج کے بدلتے ہوئے سماجی اور سیکورٹی تقاضوں کے عین مطابق ہیں۔ رول آف لاء کا نفاذ، ٹریفک نظام کی بہتری، سیف سٹی پروجیکٹ کا جلد فعال ہونا، موثر پولیسنگ، اور تھانوں میں عوام کے لیے بہتر سہولیات—یہ تمام وہ امور ہیں جو کسی بھی جدید اور ذمہ دار پولیس فورس کی بنیادی ترجیحات ہونی چاہئیں۔

آر پی او غازی محمد صلاح الدین کا یہ کہنا کہ پولیس کی سختی کا مقصد عوام کو محفوظ ماحول فراہم کرنا ہے ایک اہم اور بروقت پیغام ہے۔ آج جب جرائم کی نوعیت بدل رہی ہے اور چیلنجز بڑھ رہے ہیں، جدید ٹیکنالوجی سے فائدہ اٹھانا اور شفافیت کے ساتھ قانون نافذ کرنا وقت کی ضرورت ہے۔ یقینی طور پر سیف سٹی پروجیکٹ کا مکمل فعال ہونا ریجن میں امن و امان کے قیام میں مرکزی کردار ادا کرے گا۔

تھانوں میں آنے والے شہریوں سے خوش اخلاقی، احترام اور فوری تعاون پر زور دینا پولیسنگ کے انسانی پہلو کو اجاگر کرتا ہے۔ عوامی مسائل کے بروقت حل، اوپن کورٹس کا انعقاد، اور مؤثر پبلک سروس ڈلیوری وہ اصول ہیں جو پولیس اور عوام کے درمیان اعتماد سازی میں بنیادی کردار ادا کرتے ہیں۔

آر پی او کی یہ ہدایت بھی قابلِ تعریف ہے کہ ضلعی پولیس انتظامیہ دیگر اداروں کے ساتھ قریبی رابطہ رکھے، تاکہ سیکیورٹی، ٹریفک اور عوامی سہولتوں کے حوالے سے مربوط اور دیرپا حکمت عملی تشکیل دی جاسکے۔ اسی طرح صحافیوں اور وکلاء کے ساتھ خوشگوار تعلقات اور ان کے جائز مسائل کا حل معاشرے کے مختلف طبقات کے ساتھ تعاون کے عمل کو مستحکم کرے گا۔

قبضہ مافیا کے خلاف بلا تفریق کارروائی اور پولیس اسٹیشنوں کی مرمت و ترقیاتی منصوبوں کی بروقت تکمیل جیسے نکات بھی اس بات کا اظہار ہیں کہ پولیس فورس اپنی داخلی بہتری اور عوامی خدمت کے دوہری اہداف پر بیک وقت کام کرنا چاہتی ہے۔

آخر میں آر پی او غازی محمد صلاح الدین نے بجا طور پر کہا کہ پولیس کی اولین ترجیح عوام کا تحفظ، مسائل کا فوری حل اور بہترین سروس ڈلیوری ہے۔ امید ہے کہ ان کی قیادت میں بہاولپور ریجن میں نہ صرف قانون کی بالادستی مضبوط ہوگی بلکہ پولیس اور عوام کے درمیان اعتماد و تعاون کا نیا دور بھی شروع ہوگا۔