امیر آف بہاول پور کے ولی عہد نے مدرسہ قاسمیہ میں زیر تعلیم یتیم بچوں کے ساتھ ناشتہ بھی کیا
مدرسہ قاسمیہ میں زیر تعلیم بچوں کے چہرے اپنے پاس پرنس بہاول عباسی کو دیکھ کر خوشی سے پھولے نہ سمائے
پیر سید محمد شاہ جرار نے نواب صلاح الدین عباسی کے لئے خصوصی دعا مانگی اور پرنس بہاول عباسی کو نیک خواہشات کے ساتھ رخصت کیا
اوچشریف(نامہ نگار)امیر آف بہاول پور نواب صلاح الدین عباسی کے ولی عہد پرنس بہاول عباس خان عباسی گزشتہ روز مدرسہ قاسمیہ ختم نبوت چوک بھٹہ ککس اوچشریف گئے،جہاں انہوں نے علاقہ کی معروف دینی وروحانی شخصیت پیر سید محمد شاہ جرار سے ان کے کزن کے بیٹے کے انتقال پر تعزیت کی اور مرحوم کے ایصال ثواب کے لئے فاتحہ خوانی کی۔بعد ازاں ولی عہد پرنس بہاول خان عباسی نے مدرسہ قاسمیہ میں زیر تعلیم یتیم بچوں کے ساتھ بیٹھ کر ناشتہ کیا۔مدرسہ قاسمیہ میں زیر تعلیم بچے پرنس بہاول عباس خان عباسی کو اپنے مابین پا کر خوشی سے پھولے نہ سمائے۔دینی وروحانی شخصیت پیر سید محمد شاہ جرار نے عباسی حکمرانوں بالخصوص آخری والی ریاست بہاول پور نواب سر صادق محمد خان خامس عباسی کی دینی خدمات کا ذکر کرتے ہوئےانہیں شاندار الفاظ میں خراج عقیدت پیش کیا۔انہوں نے امیر آف بہاول پور نواب صلاح الدین عباسی کی صحت یابی اور طویل عمری کے لئے بھی خصوصی دعا کی اور بعد ازاں پرنس بہاول خان عباسی کو دعاوں اور نیک خواہشات کے ساتھ رخصت کیا۔