آر آئی یو جے ورکرز کے مرحوم صدر مظہر اقبال کی یاد میں تعزیتی ریفرنس
مظہر اقبال نے ساری زندگی آزادی اظہار رائے اور کارکنان کے حقوق کے تحفظ کے لیے جدوجہد کی صدر پی ایف یو جے ورکرز ڈاکٹر سعدیہ کمال
اسلام آباد (اسٹاف رپورٹر) پاکستان فیڈرل یونین آف جرنلسٹس ورکرز اور نیشنل پریس کلب اسلام آباد کے باہمی اشتراک سے آر آئی یو جے ورکرز کے مرحوم صدر مظہر اقبال کی یاد میں تعزیتی ریفرنس کا انعقاد کیا گیا۔ تقریب کی نظامت کے فرائض آر آئی یو جے کے سیکرٹری حمید اللہ عابد نے انجام دیے۔ اس موقع پر پی ایف یو جے ورکرز کی صدر ڈاکٹر سعدیہ کمال، پی ایف یو جے برنا کے صدر افضل بٹ، پی ایف یو جے دستور کے صدر حاجی نواز رضا، نیشنل پریس کلب کے سیکرٹری نئیر علی، اپنیک کے صدر صدیق انظر، جاوید ملک اور دیگر مقررین نے مرحوم کو بھرپور خراجِ عقیدت پیش کیا۔
مقررین نے کہا کہ مظہر اقبال نے ساری زندگی آزادی اظہار رائے اور کارکنان کے حقوق کے تحفظ کے لیے جدوجہد کی۔ ان کی انتھک محنت اور جرات مندانہ کردار ہمیشہ یاد رکھا جائے گا۔ ان کی یہ خواہش تھی کہ تمام صحافتی تنظیمیں متحد ہو کر دھڑے بندیوں کا خاتمہ کریں اور کارکنان کے حقوق کے لیے مشترکہ تحریک چلائیں۔ مقررین نے کہا کہ آج تمام صحافتی تنظیموں کا ایک پلیٹ فارم پر اکٹھا ہونا مظہر اقبال کی آرزو کی تکمیل ہے، جس سے ان کی روح کو سکون ملے گا۔ تقریب میں مرحوم کے صاحبزادے نعمان مظہر اور بہو زویا نعمان نے بھی شرکت کی اور اپنے والد محترم کی یادیں بیان کیں، جنہیں سن کر شرکاء نم دیدہ ہو گئے۔پروگرام کے آخر میں صحافی شبیر عثمانی نے مرحوم کے ایصال ثواب کیلئے دعا کرائی