پاکستان 2025ء میں آئی سی سی چیمپیئنز ٹرافی کی میزبانی کرے گا

دبئی (ویب ڈیسک/ منگل، 16 نومبر 2021ء) انٹرنیشنل کرکٹ کونسل نے 2024ء سے ہونے والے 8 میگا ایونٹس کی میزبانی کرنے والے ممالک کا اعلان کر دیا ہے۔ آئی سی سی کے اعلان کے مطابق 2024ء کے ٹی 20 ورلڈ کپ کی میزبانی ویسٹ انڈیز اور امریکا کو تفویض کی گئی ہے۔ 2025ء میں ہونے والی آئی سی سی چیمپیئنز ٹرافی کی میزبانی پاکستان کرے گا۔ اس طرح پاکستان 1996ء کے بعد پہلی مرتبہ آئی سی سی کے کسی میگا ایونٹ کی میزبانی کے فرائض سرانجام دے گا۔

اعلان کے مطابق 2026ء کے ٹی 20 ورلڈ کپ کی میزبانی بھارت اور سری لنکا کے سپرد کی گئی ہے۔ 2027ء میں ہونے والے ون ڈے فارمیٹ کے ورلڈ کپ کی میزبانی جنوبی افریقا، زمبابوے اور نمیبیا کریں گے۔ 2028ء کے ٹی 20 ورلڈ کپ کی میزبانی آسٹریلیا اور نیوزی لینڈ کریں گے۔

بھارت 2029ء میں ہونے والی آئی سی سی چیمپئنز ترافی کی میزبانی کرے گا۔ 2030ء میں ہونے والا ٹی 20 ورلڈ کپ انگلینڈ، اسکاٹ لینڈ اور آئرلینڈ کی میزبانی میں ہو گا۔ 2031ء کے ون ڈے ورلڈ کپ کی میزبانی بھارت اور بنگلا دیش کے نام ہوئی ہے۔

واضح رہے کہ 1996ء کا ورلڈ کپ پاکستان، بھارت اور سری لنکا کی مشترکہ میزبانی میں ہوا تھا، ایونٹ کا فائنل قذافی اسٹیڈیم لاہور میں ہوا تھا۔