صدر مملکت نے اردن کے شاہ عبداللہ دوم کو اعلیٰ ترین سول ایوارڈ سے نواز دیا

دوسری جانب بادشاہ اردن نے صدر آصف علی زرداری کو ’’وسامُ النّہضہ المرصّع‘‘ (آرڈر آف دی رینیسانس) سے نوازا، جو سربراہانِ مملکت اور معزز شخصیات کو دیا جاتا ہے

اسلام آباد: پاکستان کی جانب سے اردن کے شاہ عبداللہ دوم کو اعلیٰ ترین سول ایوارڈ ’نشان پاکستان‘ سے نواز دیا گیا۔  وفاقی دارالحکومت میں ایوان صدر میں اردن کے شاہ عبداللہ دوم کو پاکستان کا اعلیٰ ترین سول ایوارڈ دینے کے لیے پروقار تقریب کا انعقاد کیا گیا، تقریب کا آغاز تلاوت قرآن پاک سے کیا گیا، تقریب میں دونوں ملکوں کے قومی ترانے بجائے گئے، صدر مملکت آصف علی زرداری نے شاہ عبداللہ دوم کو نشان امتیاز سے نوازا۔  

 تقریب میں اعلیٰ سول و عسکری حکام بشمول وزیر اعظم محمد شہباز شریف، فیلڈ مارشل سید عاصم منیر، ایئر چیف مارشل ظہیر احمد بابر سدھو اور ایڈمرل نوید اشرف کے علاوہ وفاقی کابینہ کے ارکان اور سفرا بھی موجود تھے۔  دوسری جانب بادشاہ اردن نے صدر آصف علی زرداری کو ’’وسامُ النّہضہ المرصّع‘‘ (آرڈر آف دی رینیسانس) سے نوازا، جو سربراہانِ مملکت اور معزز شخصیات کو دیا جاتا ہے۔  صدرمملکت کودیا گیا اعزازپاکستان کےساتھ اردن کی جانب سےگہرے احترام،تحسین اوردوستی کی علامت ہے، جب کہ تقریب میں  شاہ عبدالّلہ دوم نے دو ریاستی حل کے تحت آزاد، خودمختار اور قابلِ عمل فلسطینی ریاست کے قیام پر زور دیا، دونوں رہنماؤں نے مختلف شعبوں میں دوطرفہ تعاون کو وسعت دینے پر اتفاق کیا۔