دکھی انسانیت کی خدمت اپنے عظیم بزرگوں سے ورثے میں ملی ہے۔ صادق گڑھ پیلس کے دفتر میں ولی عہد بہاولپور کی مختلف عوامی وفود سے گفتگو
پرنس بہاول عباسی نے چک 35 رشید آباد میں رسول بخش عباسی اور بستی غوث بخش چنی گوٹھ میں محمد اسلم اور راؤ محمد اقبال سے اظہار تعزیت کیا اور مرحومین کے لیے فاتحہ خوانی کی
احمد پور شرقیہ+چنی گوٹھ+ڈیرہ نواب صاحب (نامہ نگاران) پرنس بہاول خان عباسی کی این اے 166 کے علاقوں چنی گوٹھ ، اچشریف اور احمد پور شرقیہ میں عوامی رابطہ محم برابر جاری ہے ۔ ولی عہد بہاولپور اگلے روز چک 35 رشید آباد گئے جہاں انہوں نے رسول بخش عباسی سے ان کے صاحب زادے محمد سلمان عباسی کے انتقال پر تعزیت کی۔ اس موقع پر انہوں نے مرحوم کے درجات کی بلندی اور پسماندگان کے لیے صبر جمیل کی دعا بھی کی ۔ بعد ازاں انہوں نے بستی غوث بخش چنی گوٹھ میں محمد اسلم سے ان کے چھوٹے بھائی محمد رشید اور راؤ محمد اقبال سے ان کے داماد عبد الرشید کے انتقال کر جانے پر تعزیت کی اور سوگوار خاندانوں سے اپنی دلی ہمدردی کا اظہار کیا ۔ قبل ازیں پرنس بہاول عباسی نے صادق گڑھ پیلس کے اپنے دفتر میں مختلف نمایندہ وفود سے گفتگو کرتے ہوئے کہا کہ وہ اپنے عظیم اسلاف کے نقش قدم پر چلتے ہوئے دکھی انسانیت کی خدمت کرنا چاہتے ہیں جس کے لیے انہوں نے سیاسی میدان کا انتخاب کیا ہے۔ انہوں نے کہا کہ بدقسمتی سے ریاست بہاولپور کے ون یونٹ میں انضمام کے بعد سے لے کر اب تک اسے پسماندگی کی نوک دار چٹانوں پر گھسیٹا جاتا رہا ہے۔ اسلئے ان کی کوشش ہے کہ عوام کی محرومیوں اور حق تلفیوں کا ہر ممکن ازالہ کیا جائے ۔
