وزیر اعلیٰ مریم نوازشریف میاں چنوں کے گاؤں 101 پندر ایل میں اولمپیئن ارشد ندیم کے گھر پہنچ گئیں
اہل خانہ کا پرخلوص استقبال،وزیر اعلیٰ مریم نواز نے ارشد ندیم کی والدہ رضیہ پروین کو گلے لگایا، مبارکباد دی، ساتھ بٹھایا، کافی دیر باتیں کیں
وزیر اعلیٰ مریم نواز نے کوچ سلمان اقبال بٹ کو بھی پچاس لاکھ روپے کا چیک دیا، کوچ اور استاد کو بھی شاباش دی
لاہور13- اگست:……”ہیرو کی پذیرائی“کیلئے وزیر اعلیٰ پنجاب مریم نواز شریف خودمیاں چنوں کے نواحی گاؤں میں اولمپیئن ارشد ندیم کے گھر پہنچ گئیں۔ 101 پندرہ ایل میں وزیر اعلیٰ مریم نواز شریف کی آمد پر اولمپیئن ارشد ندیم اور اہل خانہ نے پر خلوص استقبال کیا۔ وزیر اعلیٰ مریم نواز شریف نے ارشد ندیم کی والدہ محترمہ رضیہ پروین کو گلے لگایا اور مبارکباد پیش کی۔ وزیر اعلیٰ مریم نواز شریف نے ارشد ندیم کی والدہ کو اپنے ساتھ بٹھایا اور کافی دیر باتیں کرتی رہیں۔ وزیر اعلیٰ مریم نواز شریف نے گھر کے اندر خود جاکر ارشد ندیم کے اہل خانہ سے ملاقات کی اور مبارکباد دی۔ وزیر اعلیٰ مریم نواز شریف نے اہل خانہ کے ساتھ تصاویر اور سیلفیاں بھی بنوائیں۔ اولمپئین ارشد ندیم نے اولمپکس مقابلوں کی یاد تازہ کی اور اپنی کاوش سے آگاہ کیا۔ وزیر اعلیٰ مریم نواز شریف نے اولمپیئن ارشد ندیم کو 10 کروڑ روپے کا چیک اور ہنڈا سوک کا ر”پی اے کے“92.97کی چابی پیش کیا۔ وزیر اعلیٰ مریم نواز نے کوچ سلمان اقبال بٹ کو بھی پچاس لاکھ روپے کا چیک دیا اور ارشد ندیم کے کوچ اور استاد کو بھی شاباش دی۔ وزیر اعلیٰ مریم نوازشریف نے کہا کہ ارشد ندیم نے قوم کو بے مثال خوشی سے ہمکنار کیا۔ اولمپیئن ارشد ندیم اور انکے والدین نے وزیر اعلیٰ کی آمد کو عزت افزائی قرار دیا۔ سینئر منسٹر مریم اورنگزیب، وزیر کھیل فیصل ایوب کھوکھر، معاون خصوصی ذیشان ملک ایم پی اے ثانیہ عاشق، عامر حیات ہراج، پیر اسلم بودلہ،چیف سیکرٹری، اے سی ایس ساوتھ،اے آئی جی ساوتھ،سیکرٹری سپورٹس،کمشنر، آر پی او، ڈپٹی کمشنراور دیگر بھی موجود تھے۔
٭٭٭٭
