مخدوم سید احمد محمود کی اپنے فرزند، مخدوم سید مرتضیٰ محمود کے ہمراہ طارق بشیر چیمہ سےان کی رہائش گاہ پر ملاقات

محترمہ نتاشہ دولتانہ، حسن عسکری شیخ, سید عامر علی شاہ ، خواجہ رضوان عالم، چوہدری ولی داد چیمہ، ، عبدالقادر شاہین اور دیگر سیاسی شخصیات بھی موجود تھیں

چنی گوٹھ (نامہ نگار) سابق گورنر پنجاب اور صدر پاکستان پیپلز پارٹی جنوبی پنجاب مخدوم سید احمد محمود اپنے فرزند، رکن قومی اسمبلی مخدوم سید مرتضیٰ محمود کے ہمراہ سابق وفاقی وزیر ایم این اے و سینئر سیاسی رہنما چوہدری طارق بشیر چیمہ کی رہائش گاہ پہنچے، جہاں انہوں نے چوہدری طارق بشیر چیمہ سے ملاقات کی۔ اس موقع پر سیاسی، باہمی اور علاقائی امور سمیت جنوبی پنجاب کی مجموعی صورتحال پر تفصیلی تبادلہ خیال کیا گیا

ملاقات کے دوران جنوبی پنجاب میں جاری سیاسی سرگرمیوں، عوامی مسائل، ترقیاتی ضروریات اور آئندہ کے سیاسی منظرنامے سمیت باہمی دلچسپی کے مختلف امور پر گفتگو ہوئی۔ رہنماؤں نے اس امر پر بھی تبادلہ خیال کیا کہ جنوبی پنجاب کے عوام کو درپیش مسائل کے حل، بنیادی سہولیات کی فراہمی اور خطے کی ترقی کے لیے سیاسی قیادت کو مؤثر کردار ادا کرنا چاہیے۔ذرائع کے مطابق ملاقات خوشگوار ماحول میں ہوئی اور اس دوران جنوبی پنجاب کی سیاست میں باہمی رابطوں اور مشاورت کے عمل کو مزید مضبوط بنانے سمیت مختلف امور پر رائے کا تبادلہ بھی کیا گیا۔ ملاقات میں اس بات پر بھی اتفاق پایا گیا کہ خطے کے عوام کے مسائل کو اجاگر کرنے اور ان کے حل کے لیے منتخب نمائندوں اور سیاسی قیادت کے درمیان مؤثر رابطہ ضروری ہے۔

اس اہم سیاسی ملاقات کے موقع پر محترمہ نتاشہ دولتانہ، صوبائی پارلیمانی سیکرٹری پنجاب و ایم پی اے حسن عسکری شیخ،ایم پی اے سید عامر علی شاہ ، خواجہ رضوان عالم، سید عرفان گردیزی، چوہدری ولی داد چیمہ، جاوید اکبر ڈھلوں، ریاض احمد سامٹیہ، راؤ ساجد خان، محمد طاہر وینس، عبدالقادر شاہین اور دیگر سیاسی و سماجی شخصیات بھی موجود تھیں۔ملاقات کو جنوبی پنجاب کی سیاسی سطح پر اہم پیش رفت قرار دیا جا رہا ہے، کیونکہ اس میں خطے کی اہم سیاسی شخصیات نے ایک ہی نشست میں شرکت کی اور جنوبی پنجاب کے سیاسی و عوامی معاملات پر باہمی مشاورت کی۔