کشمیر کا مسئلہ محض زمین کا نہیں کشمیری عوام کے بنیادی حقوق اور مستقبل کا مسئلہ ہے، عالمی برادری اپنا کردار ادا کرے:صاحبزادہ محمد عمر خان عباسی

محسنِ پاکستان سر صادق محمد خان عباسی پنجم کے پوتے، معروف سیاسی و سماجی شخصیت اور سینئر مرکزی نائب صدر انجمن اتحادِ عباسیہ پاکستان کا بیان

احمدپورشرقیہ(نماٸندہ خصوصی): 5 اگست 2026ء کو ساتویں یومِ استحصالِ کشمیر کے موقع پر صاحبزادہ محمد عمر داؤد خان عباسی نے میڈیا کو جاری اپنے بیان میں کہا ہے کہ کشمیر کا مسئلہ محض ایک جغرافیائی تنازع نہیں بلکہ کشمیری عوام کے بنیادی انسانی، سیاسی اور جمہوری حقوق، ان کے مستقبل اور حقِ خودارادیت سے وابستہ ایک اہم مسئلہ ہے۔

انہوں نے کہا کہ 5 اگست 2019ء کے اقدامات نے مسئلہ کشمیر کی حساسیت کو مزید اجاگر کیا اور کشمیری عوام کے سیاسی و شہری حقوق کے حوالے سے عالمی سطح پر نئے سوالات پیدا کیے۔ عالمی برادری بالخصوص اقوامِ متحدہ کی ذمہ داری ہے کہ وہ کشمیر کی صورتحال کا غیر جانب دارانہ جائزہ لے اور انسانی حقوق کے عالمی اصولوں کے مطابق کشمیری عوام کی مشکلات کے خاتمے کے لیے مؤثر کردار ادا کرے۔

صاحبزادہ محمد عمر داؤد خان عباسی نے کہا کہ کشمیر میں پائیدار امن طاقت، پابندیوں یا محض انتظامی اقدامات سے قائم نہیں ہوسکتا۔ امن کا راستہ مذاکرات، سیاسی تدبر، باہمی احترام اور انصاف سے نکلتا ہے۔ پاکستان اور بھارت کو چاہیے کہ کشیدگی کم کرنے کے لیے سنجیدہ اور بامعنی مذاکرات کا راستہ اختیار کریں تاکہ جنوبی ایشیا کے کروڑوں عوام کو مستقل امن، ترقی اور خوشحالی کا موقع مل سکے۔

انہوں نے کہا کہ پاکستان کشمیری عوام کے ساتھ اپنی اخلاقی، سیاسی اور سفارتی حمایت جاری رکھے گا۔ مسئلہ کشمیر کو عالمی سطح پر مؤثر انداز میں اجاگر کرنے کے لیے ضروری ہے کہ سفارتی کوششوں کو مزید منظم اور مضبوط بنایا جائے اور عالمی انسانی حقوق کے اداروں سے مسلسل رابطہ رکھا جائے۔

ان کا کہنا تھا کہ کشمیر کے عوام بھی امن، تعلیم، روزگار، ترقی اور باوقار زندگی کے خواہاں ہیں۔ اس لیے مسئلے کے حل کے لیے ایسی سنجیدہ حکمتِ عملی ضروری ہے جو انسانی جانوں کے تحفظ، شہری آزادیوں اور سیاسی حقوق کو مرکزی اہمیت دے۔

انہوں نے عالمی برادری پر زور دیا کہ وہ جنوبی ایشیا میں امن کے قیام کے لیے اپنا کردار ادا کرے اور پاکستان و بھارت کے درمیان بامعنی مذاکرات کی حوصلہ افزائی کرے۔ دیرینہ تنازعات کو آنے والی نسلوں کے لیے ورثے میں چھوڑنے کے بجائے سیاسی بصیرت اور سفارتی حکمتِ عملی کے ذریعے حل کرنے کی ضرورت ہے۔

صاحبزادہ محمد عمر داؤد خان عباسی نے کہا کہ 5 اگست صرف احتجاج اور اظہارِ یکجہتی کا دن نہیں بلکہ عالمی ضمیر کو یہ یاد دلانے کا موقع بھی ہے کہ انسانی حقوق، آزادی، انصاف اور امن کے اصول پوری انسانیت کے لیے یکساں ہونے چاہئیں۔

انہوں نے کشمیری عوام کے ساتھ مکمل یکجہتی کا اظہار کرتے ہوئے کہا کہ پاکستان کی عوام اور قیادت کو چاہیے کہ مسئلہ کشمیر کو پرامن، جمہوری اور سفارتی ذرائع سے عالمی سطح پر اجاگر کرنے کا سلسلہ جاری رکھیں، کیونکہ جنوبی ایشیا کا پائیدار امن انصاف، باہمی احترام اور مسئلہ کشمیر کے پرامن حل سے وابستہ ہے۔