جرنلسٹس الائنس پاکستان جنوبی پنجاب باب برائے رورل و قصبائی پریس کلبز  منشور

جنوبی پنجاب، پاکستان یکم اگست 2026

 دیباچہ

 جرنلسٹس الائنس پاکستان (جے اے پی) اس یقین پر قائم ہے کہ آزاد، خودمختار اور ذمہ دار صحافت جمہوری نظام، باخبر معاشرے اور پائیدار ترقی کی بنیادی ضرورت ہے۔ رورل اور قصبائی علاقوں میں خدمات انجام دینے والے صحافیوں کے اہم کردار کو تسلیم کرتے ہوئے جنوبی پنجاب باب قائم کیا گیا ہے تاکہ ان کی اجتماعی آواز کو مضبوط بنایا جائے، پیشہ ورانہ معیار کو فروغ دیا جائے، آزادیٔ صحافت کا تحفظ کیا جائے اور خطے کے پریس کلبوں کے درمیان ادارہ جاتی تعاون کو مستحکم بنایا جائے۔ جنوبی پنجاب کے رورل اور قصبائی علاقوں میں صحافی اکثر ایسے حالات میں اپنے فرائض انجام دیتے ہیں جن کا سامنا بڑے شہری مراکز کے صحافیوں کو نسبتاً کم کرنا پڑتا ہے۔ محدود ادارہ جاتی معاونت، پیشہ ورانہ ترقی کے کم مواقع، معاشی مشکلات اور سلامتی سے متعلق خطرات ان کی پیشہ ورانہ ذمہ داریوں کو متاثر کرتے ہیں۔ یہ منشور جنوبی پنجاب باب کے بنیادی اصول، وژن اور مقاصد کا تعین کرتا ہے اور اخلاقی صحافت، ادارہ جاتی استحکام اور صحافیوں کی فلاح و بہبود کے فروغ کے عزم کا اظہار کرتا ہے۔ وژن ایک ایسا جنوبی پنجاب جہاں رورل تحصیل یا چھوٹے قصبے میں کام کرنے والے ہر صحافی کو — نہ صرف بڑے پریس مراکز میں مقیم صحافیوں کو — پیشہ ورانہ تربیت، اجتماعی نمائندگی اور اپنے حقوق کے تحفظ تک رسائی حاصل ہو، اور وہ عوامی مفاد میں آزادانہ اور محفوظ انداز میں رپورٹنگ کر سکے۔ مشن خطے کے رورل اور قصبائی پریس کلبوں کو ایک واحد نمائندہ پلیٹ فارم میں متحد کرنا؛ ان کے ارکان کی پیشہ ورانہ صلاحیت کو بڑھانا؛ اور پنجاب کے بڑے شہری پریس مراکز سے باہر خدمات انجام دینے والے صحافیوں کے تحفظ، فلاح اور ادارہ جاتی پہچان کے لیے اجتماعی طور پر آواز بلند کرنا۔ تاسیسی پس منظر یہ باب بہاولپور، رحیم یار خان اور مظفر گڑھ کے اضلاع میں چودہ رکن پریس کلبوں کو یکجا کرتا ہے، جبکہ اندرونِ سندھ تک مزید توسیع زیرِ غور ہے۔ اس کے قیام کا اعلان جولائی 2026 میں کیا گیا اور خطے کے 66 پرنٹ و ڈیجیٹل اخبارات، چار ای پیپرز اور تین ویب ٹی وی چینلز نے اسے نشر کیا — جو رورل صحافیوں میں منظم نمائندگی کی طلب کا ابتدائی اظہار ہے۔ 

بنیادی مقاصد  نمائندگی: رورل اور قصبائی صحافیوں اور پریس کلبوں کو جرنلسٹس الائنس پاکستان کے اندر ایک متحد، جمہوری اور نمائندہ پلیٹ فارم فراہم کرنا، ان کی اجتماعی آواز کو تقویت دینا اور ان کے جائز پیشہ ورانہ مفادات کا فروغ۔

. آزادیٔ صحافت اور تحفظ: اظہارِ رائے کی آزادی کا دفاع کرنا، صحافیوں کی سلامتی و تحفظ کے لیے آواز اٹھانا، میڈیا کارکنوں کو درپیش دھمکیوں اور حملوں کو دستاویزی شکل دینا، اور جہاں کہیں بھی صحافیوں کو ان کے پیشہ ورانہ فرائض کی ادائیگی کے دوران روکا، ڈرایا یا نقصان پہنچایا جائے وہاں جوابدہی کو فروغ دینا۔ 

. پیشہ ورانہ ترقی: تحقیقاتی صحافت، نیوز روم رپورٹنگ، اخلاقی صحافت، ڈیجیٹل و ملٹی میڈیا صحافت، معلومات کی تصدیق، میڈیا قانون، عوامی مفاد کی رپورٹنگ، موسمیاتی تبدیلی کی رپورٹنگ اور آگاہی، آفات و انسانی ہمدردی کی رپورٹنگ، آن لائن ہراسانی کے خلاف تحفظ، ڈیجیٹل سیکیورٹی، صحافت میں نئی ابھرتی ٹیکنالوجیز، اور پیشے کے دیگر ارتقا پذیر شعبوں میں مسلسل پیشہ ورانہ تربیت کو فروغ دے کر صحافت میں معیار کو بڑھانا، جبکہ زندگی بھر سیکھنے، جدت اور پیشہ ورانہ ذمہ داری کو تقویت دینا۔ 

. ادارہ جاتی مضبوطی: رکن پریس کلبوں کو شفاف نظمِ حکومت، جمہوری طریقہ کار، مستحکم ادارہ جاتی ترقی، ذمہ دار قیادت اور مؤثر تنظیمی انتظام کے ذریعے مضبوط بنانا، تاکہ وہ صحافیوں اور اپنی برادریوں کی بہتر خدمت کر سکیں۔ 

. صحافیوں کی فلاح و بہبود: صحافیوں کی پیشہ ورانہ، سماجی اور معاشی فلاح کے لیے آواز اٹھانا، منصفانہ اور مساویانہ کام کے حالات کو فروغ دینا، فلاحی اقدامات اور معاون میکانزم تک رسائی کی حوصلہ افزائی کرنا، اور رورل و قصباتی برادریوں میں کام کرنے والے صحافیوں کو درپیش مخصوص مشکلات کا اعتراف کرنا۔

.

رکنیت اور یکجہتی: رورل اور قصباتی برادریوں میں اخلاقی اور خودمختار پریس کلبوں کے ایک متحد نیٹ ورک کو وسعت دینا اور مضبوط بنانا، رکن اداروں کے مابین تعاون، یکجہتی اور باہمی معاونت کی حوصلہ افزائی کرنا۔ 

. اخلاقی صحافت: سچائی، درستی، غیرجانبداری، خودمختاری، بے طرفی، دیانتداری اور جوابدہی کو صحافت کے بنیادی اصولوں کے طور پر برقرار رکھنا، ذمہ دار رپورٹنگ کو فروغ دینا جو عوامی مفاد کی خدمت کرے اور میڈیا پر عوامی اعتماد کو مضبوط بنائے۔

. تحقیق اور پالیسی سازی: رورل صحافت پر تحقیق کی حوصلہ افزائی کرنا، صحافیوں کو درپیش مشکلات کو دستاویزی شکل دینا، شواہد پر مبنی پالیسی سفارشات کی معاونت کرنا، اور میڈیا کی ترقی، صحافیوں کے حقوق اور جمہوری نظمِ حکومت پر باخبر مکالمے میں اپنا حصہ ڈالنا۔ 

. بین الاقوامی تعاون: پریس فریڈم، صحافیوں کے حقوق، میڈیا کی ترقی اور اظہارِ رائے کی آزادی کے لیے کام کرنے والی قومی اور بین الاقوامی تنظیموں کے ساتھ تعاون، علمی تبادلے، پیشہ ورانہ رابطے اور باہمی یکجہتی کے ذریعے تعمیری شراکت داری کو فروغ دینا۔ 

. شمولیت اور مساوی مواقع: رورل اور قصباتی برادریوں میں خواتین صحافیوں کی شرکت کو فروغ دینا، مساوی پیشہ ورانہ مواقع، معاون کام کے ماحول، قائدانہ صلاحیتوں کی نشوونما، تحفظ اور پیشہ ورانہ ترقی کی حوصلہ افزائی کرنا، اور ان رکاوٹوں کا خاتمہ کرنا جو رورل صحافت میں خواتین کی دیرینہ کم نمائندگی کا سبب بنی ہیں۔ تنظیمی ڈھانچہ یہ باب جرنلسٹس الائنس پاکستان کی تاسیسی نگرانی میں کام کرتا ہے۔ اس کے عہدیدار رکن پریس کلبوں میں سے منتخب کیے جاتے ہیں اور انہی کے سامنے جوابدہ ہوتے ہیں۔ جہاں رکن کلب اتفاقِ رائے سے آگے بڑھنے پر متفق ہوں وہاں انتخابات نامزد نمائندوں کے مابین اتفاقِ رائے اور ہاتھ اٹھا کر مکمل کیے جاتے ہیں۔ باب کے روزمرہ امور کی نگرانی ایک مقرر کردہ کوآرڈینیٹر کرتا ہے، جسے ہر رکن پریس کلب کے نامزد نمائندوں کی معاونت حاصل ہوتی ہے۔

 رکنیت :رکنیت جنوبی پنجاب کے ان رورل اور قصباتی پریس کلبوں کے لیے کھلی ہے جو پیشہ ورانہ اور اخلاقی صحافت کے پابند ہوں۔ ہر رکن پریس کلب باب کے اجلاسوں اور فیصلہ سازی میں شرکت کے لیے اپنے نمائندے نامزد کرتا ہے۔ باب اپنے کام سے آگاہی بڑھنے کے ساتھ رورل اور قصباتی پریس کلبوں میں رکنیت کی مسلسل توسیع کا خیرمقدم کرتا ہے۔ پریس فریڈم شراکت داروں سے اپیل ہم قومی اور بین الاقوامی پریس فریڈم تنظیموں کو دعوت دیتے ہیں کہ وہ جنوبی پنجاب باب کے قیام کے اس مرحلے میں اس کے ساتھ رابطہ کریں — مہارت کا تبادلہ کریں، تربیت اور صلاحیت سازی میں معاونت کریں، اور پاکستان کے رورل و قصباتی صحافیوں کے ساتھ یکجہتی کا اظہار کریں۔ ہمارا یقین ہے کہ دیہی علاقوں میں آزاد صحافت اسی طرح جمہوری جوابدہی کے لیے ناگزیر ہے جس طرح دارالحکومت میں، اور ہم بین الاقوامی برادری سے اس اصول کو عملی طور پر تسلیم اور اس کی معاونت کرنے کی اپیل کرتے ہیں۔  

جاری کردہ جرنلسٹس الائنس پاکستان (جے اے پی) جنوبی پنجاب باب برائے رورل و قصبائی پریس کلبز یہ منشور جرنلسٹس الائنس پاکستان کے جنوبی پنجاب باب کی بنیادی پالیسی دستاویز کے طور پر منظور کیا گیا ہے۔ 

جاری کردہ احسان احمد سحر بانی و مشیرِ ابلاغ جرنلسٹس الائنس پاکستان (جے اے پی)