وائس چانسلر پروفیسر ڈاکٹر محمد کامران نے مذکورہ لیکچرار کے خلاف فوری کاروائی کا حکم جاری کر دیا
جامعہ میں ہراسانی پر زیرو ٹالرنس ہے اور کسی بھی ملازم کو اس میں ملوث پایا گیا تو فوری کاروائی کی جائے گی وائس چانسلر
بہاول پو ر(پ ر)وائس چانسلراسلامیہ یونیورسٹی بہاول پور پروفیسر ڈاکٹر محمد کامران نے کہا ہے کہ جامعہ میں ہراسانی پر زیرو ٹالرنس ہے اور کسی بھی ملازم کو اس میں ملوث پایا گیا تو فوری کاروائی کی جائے گی۔ اس سلسلے میں جامعہ میں ہائر ایجوکیشن کمیشن کی پالیسی کے مطابق اینٹی ہراسمنٹ کمیٹی قائم ہے۔ گزشتہ روز اسلامیہ یونیورسٹی بہاول پور بہاولنگر کیمپس میں ہراسگی میں ملوث لیکچرار ندیم احمد کو فوری طور پر معطل کر کے تحقیقات کا حکم دے دیا گیا۔ ترجمان اسلامیہ یونیورسٹی بہاول پور کے مطابق گزشتہ روز بہاولنگر کیمپس میں ہراسمنٹ کی شکایت سامنے آنے پر وائس چانسلر پروفیسر ڈاکٹر محمد کامران نے مذکورہ لیکچرار کے خلاف فوری کاروائی کا حکم جاری کر دیا ہے۔ اس سلسلے میں رجسٹرار آفس نے لیکچرار ندیم احمد کی فوری معطلی کا حکم جاری کر دیا ہے۔ یونیورسٹی ہراسمنٹ کمیٹی کو اس واقع کی فوری انکوائری کر کے رپورٹ پیش کرنے کا حکم دیا گیا ہے۔
