جرنلسٹس الائنس پاکستان کے رورل و ٹاؤن پریس کلبز چیپٹر جنوبی پنجاب کا تاسیسی اجلاس یکم اگست کو ہوگا

رورل و ٹاؤن پریس کلبوں کے نمائندے منشور، اسٹیئرنگ کمیٹی اور آئندہ لائحہ عمل کی منظوری دیں گے

احمدپورشرقیہ: جرنلسٹس الائنس پاکستان (جے اے پی) کے رورل و ٹاؤن پریس کلبز چیپٹر، جنوبی پنجاب کا تاسیسی اجلاس یکم اگست 2026ء کو پنجاب کالج احمدپورشرقیہ میں منعقد ہوگا۔ اجلاس کا اہتمام ڈیجیٹل روزنامہ نوائے احمدپور شرقیہ پنجاب کالج احمدپورشرقیہ کے تعاون سے کر رہا ہے۔

یہ چیپٹر جنوبی پنجاب کے 14 رورل اور ٹاؤن پریس کلبوں کو ایک مشترکہ پلیٹ فارم پر متحد کرتا ہے تاکہ جاگیردارانہ نظام، معاشی محرومی اور انتہاپسندی سے متاثرہ علاقوں میں خدمات انجام دینے والے صحافیوں کی نمائندگی اور آواز کو علاقائی و قومی سطح پر مؤثر بنایا جا سکے۔

یہ اقدام 12 اکتوبر 2025ء کو ڈیجیٹل روزنامہ نوائے احمدپور شرقیہ کی جانب سے شروع کیا گیا تھا، جبکہ اس کے قیام کی خبر اب تک 66 پرنٹ و ڈیجیٹل اخبارات، 4 ای پیپرز اور 3 ویب ٹی وی چینلز شائع اور نشر کر چکے ہیں۔

تاسیسی اجلاس میں اسٹیئرنگ کمیٹی کی باضابطہ منظوری، جے اے پی کے بانی احسان احمد سحر کے تیار کردہ منشور کی منظوری، اسٹیئرنگ کمیٹی کے مقاصد و اہداف کا جائزہ، تنظیمی استحکام، صحافیوں کی فلاح اور مستقبل کی منصوبہ بندی پر مشتمل تین ورکنگ سیشنز منعقد ہوں گے۔ اجلاس کے اختتام پر بانی اراکین میں شرکت کے اسناد تقسیم کیے جائیں گے جبکہ شرکاء کے اعزاز میں ظہرانہ بھی دیا جائے گا۔

جرنلسٹس الائنس پاکستان کے بانی اصولوں کے مطابق چیپٹر کی قیادت اور ملکیت مکمل طور پر رورل اور ٹاؤن پریس کلبوں کے پاس ہوگی، جبکہ جے اے پی کے بانی احسان احمد سحر صرف میڈیا ایڈوائزر کی حیثیت سے خدمات انجام دیں گے اور کسی تنظیمی عہدے کے امیدوار نہیں ہیں۔

تاسیسی اجلاس میں شرکت صرف دعوت نامے کی بنیاد پر ہوگی اور تمام بانی رکن پریس کلبوں کو دعوت نامے ارسال کیے جا چکے ہیں۔

مزید معلومات کے لیے رابطہ:
احسان احمد سحر، میڈیا ایڈوائزر، جرنلسٹس الائنس پاکستان (جے اے پی)

03017740405