دی گورنمنٹ صادق کالج ویمن یونیورسٹی بہاولپور کے نئے کیمپس کے قیام کا منصوبہ پنجاب حکومت کے زیر غور ہے وائس چانسلر پروفیسر ڈاکٹر شازیہ انجم

وائس چانسلر کا عہدہ سنبھالنے کے بعد  ادارے کی بہتری کے لیے عملی اقدامات کیے ہیں جس کے مثبت نتائج سامنے آئے ہیں  پروفیسر ڈاکٹر شازیہ انجم کی ضلعی امن کمیٹی کے رکن مخدوم سید امجد بُخاری سے ملاقات میں گفتگو

بہاولپور : دی گورنمنٹ صادق کالج ویمن یونیورسٹی بہاولپور کی وائس چانسلر محترمہ پروفیسر ڈاکٹر شازیہ انجم نے کہا ہے کہ یونیورسٹی کی ترقی، تعلیمی معیار میں بہتری اور طالبات کو جدید تقاضوں سے ہم آہنگ تعلیم کی فراہمی ان کی اولین ترجیح ہے۔ انہوں نے کہا کہ عہدہ سنبھالنے کے بعد سے ادارے کی بہتری کے لیے متعدد اقدامات کیے گئے ہیں جن کے مثبت نتائج سامنے آ رہے ہیں۔ ان خیالات کا اظہار انہوں نے ضلعی امن کمیٹی کے رکن مخدوم سید امجد حسین بُخاری سے ملاقات کے دوران یونیورسٹی کی کارکردگی اور مستقبل کے منصوبوں پر گفتگو کرتے ہوئے کیا۔

وائس چانسلر نے بتایا کہ ان کی قیادت میں مختلف فیکلٹیز کو مزید مضبوط اور فعال بنایا گیا ہے جبکہ یونیورسٹی میں طالبات کی انرولمنٹ میں بھی خاطر خواہ اضافہ ہوا ہے، جو ادارے پر عوام کے بڑھتے ہوئے اعتماد کا مظہر ہے۔ انہوں نے کہا کہ تدریسی اور تحقیقی معیار کو بہتر بنانے کے لیے مختلف شعبہ جات کے اساتذہ اور لیکچررز کی پیشہ ورانہ تربیت پر خصوصی توجہ دی گئی ہے۔ جدید تدریسی طریقوں، تحقیق کے فروغ اور طالبات کی ہمہ جہت تربیت کے لیے متعدد اقدامات کیے جا رہے ہیں تاکہ یونیورسٹی قومی و بین الاقوامی معیار کے مطابق اپنی شناخت مزید مستحکم کر سکے۔

وائس چانسلر نے مزید بتایا کہ یونیورسٹی کی توسیع اور بڑھتی ہوئی تعلیمی ضروریات کو مدنظر رکھتے ہوئے نئے کیمپس کے قیام کا منصوبہ بھی زیر غور ہے۔ انہوں نے امید ظاہر کی کہ پنجاب حکومت کی جانب سے اراضی کی فراہمی کے بعد اس منصوبے پر عملی پیش رفت ممکن ہوگی، جس سے خطے کی مزید طالبات کو اعلیٰ تعلیم کے مواقع میسر آئیں گے۔ انہوں نے اس عزم کا اعادہ کیا کہ دی گورنمنٹ صادق کالج ویمن یونیورسٹی بہاولپور کو خواتین کی اعلیٰ تعلیم، تحقیق اور علمی ترقی کا ایک مثالی ادارہ بنانے کے لیے تمام دستیاب وسائل بروئے کار لائے جائیں گے۔ ان کا کہنا تھا کہ یونیورسٹی انتظامیہ طالبات کو معیاری تعلیم، جدید سہولیات اور سازگار تعلیمی ماحول فراہم کرنے کے لیے مسلسل کوشاں ہے۔ ملاقات کے دوران یونیورسٹی کی مجموعی کارکردگی، تعلیمی کامیابیوں اور مستقبل کے ترقیاتی منصوبوں پر بھی تفصیلی تبادلہ خیال کیا گیا اور اس امید کا اظہار کیا گیا کہ ادارہ آنے والے برسوں میں مزید ترقی اور کامیابی کی نئی منازل طے کرے گی