حکومت کا کنیکٹڈ پنجاب کے نام سے نیا منصوبہ لانے کا اعلان

پنجاب حکومت نے صوبہ گیر ہائی سپیڈ انٹرنیٹ اور ڈیجیٹل گورننس منصوبہ شروع کرنے کا فیصلہ کر لیا، کنیکٹڈ پنجاب پراجیکٹ کی مجموعی لاگت 100 ملین ڈالر مقرر کرنے کی تیاری شروع کر دی گئی۔

حکومت کے مطابق بغیر کام کے کوئی قسط جاری نہیں ہوگی، منصوبے کے تحت پورے پنجاب میں فائبر آپٹک نیٹ ورک بچھایا جائے گا۔

لاہور:  پنجاب حکومت نے کنیکٹڈ پنجاب کے نام سے نیا منصوبہ لانے کا اعلان کر دیا۔ نجاب حکومت نے صوبہ گیر ہائی سپیڈ انٹرنیٹ اور ڈیجیٹل گورننس منصوبہ شروع کرنے کا فیصلہ کر لیا، کنیکٹڈ پنجاب پراجیکٹ کی مجموعی لاگت 100 ملین ڈالر مقرر کرنے کی تیاری شروع کر دی گئی۔  منصوبے کیلئے فنڈز بیرونی فنانسنگ کے ذریعے حاصل کیے جائیں گے، قرض کی ادائیگی کارکردگی سے مشروط ہوگی، ڈی ایل آئی ماڈل کے تحت فنڈز جاری ہوں گے۔

 حکومت کے مطابق بغیر کام کے کوئی قسط جاری نہیں ہوگی، منصوبے کے تحت پورے پنجاب میں فائبر آپٹک نیٹ ورک بچھایا جائے گا۔  رائٹ آف وے اور این او سی قوانین نرم کر کے نجی کمپنیوں کیلئے راستہ بنایا جائے گا، نجی ٹیلی کام کمپنیاں دیہی اور پسماندہ علاقوں تک فائبر پہنچائیں گی۔  اس وقت پنجاب میں صرف 16 فیصد ٹاورز فائبرائزڈ ہیں، حکومت نے خلا پُر کرنے کا فیصلہ کیا، سرکاری دفاتر کو ایک ہی ہائی سپیڈ ڈیجیٹل نیٹ ورک سے جوڑنے کی تیاری جاری ہے۔  فائلوں اور سرکاری ریکارڈ کو مکمل طور پر آن لائن منتقل کیا جائے گا، فیسوں، ٹیکسوں اور جرمانوں کی ادائیگی موبائل اور کارڈ سے ممکن بنائی جائے گی۔  

کم از کم 15 مختلف شعبوں کو ڈیجیٹل ادائیگی نظام سے منسلک کرنے کا ہدف طے کیا گیا ہے، منصوبے سے شہریوں کو دفاتر کے چکر، تاخیر اور رشوت سے نجات دلانے کا دعویٰ کیا جا رہا ہے۔  پنجاب حکومت کے مطابق کنیکٹڈ پنجاب سے کروڑوں شہری تیز انٹرنیٹ، شفاف نظام اور بہتر سہولیات حاصل کر سکیں گے