پنجاب میں نئی پیشرفت پیرا فورس” کا قیام — عوام کے حقوق کی محافظ فورس

تحریر: نعمان مسعود خان ڈپٹی ڈائریکٹر پبلک ریلیشنز لودھراں

  وزیراعلیٰ پنجاب محترمہ مریم نواز شریف نے صوبے میں مہنگائی، ذخیرہ اندوزی اور تجاوزات کے خاتمے کے لیے انقلابی قدم اٹھاتے ہوئے پنجاب انفورسمنٹ اینڈ ریگولیٹری اتھارٹی (پیرا) کا باضابطہ قیام عمل میں لایا گیا ہے۔ اس اقدام کا مقصد عوام کو استحصالی عناصر سے نجات دلانا اور قانون کی عمل داری کو ہر گلی کوچے، بازار اور ہر بستی تک پہنچانا ہے۔ وزیراعلیٰ نے پیرا کی افتتاحی تقریب سے خطاب کرتے ہوئے کہا کہ ”میری اور عوام کی نظریں اب پیرا پر ہوں گی، اور پیرا کی نظر ان عناصر پر جو مہنگائی، ذخیرہ اندوزی اور تجاوزات کے ذریعے عوام کا سکون غارت کرتے ہیں۔” انہوں نے کہا کہ اب وہ وقت ختم ہو چکا جب عوام اپنی زندگی بھر کی جمع پونجی سے زمین کا ٹکڑا خرید کر بھی قبضہ مافیا کے رحم و کرم پر ہوتے تھے۔محترمہ مریم نواز شریف نے کہا کہ پیرا ایک ایسا ادارہ ہوگا جو مظلوم کی ڈھال اور ظالم کے لیے خوف کی علامت بنے گا۔ پیرا کا ہر اہلکار قانون کے نفاذ کا ضامن ہوگا، اور وہ دن دور نہیں جب پنجاب کے ہر ضلع اور تحصیل میں پیرا کی موجودگی عوام کو تحفظ اور انصاف کا یقین دلائے گی

صوبائی وزیر اطلاعات عظمیٰ بخاری

  وزیراعلیٰ نے واضح کیا کہ ماضی میں پرائس کنٹرول، تجاوزات اور ذخیرہ اندوزی کے خلاف انتظامیہ کی بھاگ دوڑ محدود اور غیر مؤثر تھی لیکن پیرا کے قیام کے بعد ایک مربوط، منظم اور جدید نظام کے ذریعے ان مسائل کا مستقل حل ممکن ہوگا۔ پنجاب کی 144 تحصیلوں میں پیرا اسٹیشنز قائم کیے جا رہے ہیں جنہیں جدید ڈیجیٹل آلات، گاڑیوں اور دیگر سہولتوں سے آراستہ کیا جا رہا ہے۔ وزیراعلیٰ نے پیرا کے افسران کی تربیت کو سراہتے ہوئے کہا کہ ان کی آنکھوں میں پاکستانیت اور خدمت کا جذبہ نظر آتا ہے۔ ان کا کہنا تھا کہ ”اب ہر مظلوم کے ساتھ ریاست کھڑی ہوگی اور قانون صرف غریب نہیں بلکہ طاقتور پر بھی یکساں لاگو ہوگا ۔”وزیراعلیٰ نے دوٹوک الفاظ میں کہا کہ ”ڈالا کلچر کو ہرگز برداشت نہیں کیا جائے گا، اور جو قانون شکنی کرے گا وہ کسی بھی حیثیت کا حامل ہو، قانون کی گرفت سے بچ نہیں پائے گا۔” ان کا کہنا تھا کہ کرپشن سے کمائی گئی دولت کبھی سکون نہیں دے سکتی، جبکہ حلال کمائی میں برکت ہوتی ہے۔ ”بہادری ایک نعمت ہے، اور میں ایسے افراد کو پسند کرتی ہوں جو ڈٹ کر ایمانداری سے کام کرتے ہیں۔” پیرا کے قیام سے نہ صرف پرائس کنٹرول کو مؤثر بنایا جائے گا بلکہ مارکیٹوں، گلیوں اور بازاروں میں سے تجاوزات ختم کر کے خواتین کے لیے محفوظ ماحول کو بھی یقینی بنایا جا رہا ہے۔ وزیراعلیٰ نے بتایا کہ تجاوزات کے خاتمے سے جہاں دکانداروں کی فروخت میں اضافہ ہوا، وہیں ٹریفک کی روانی میں بھی بہتری آئی ہے۔ وزیراعلیٰ نے کہا کہ پیرا ایک ادارہ نہیں بلکہ پنجاب کے لیے ایک نیا وژن ہے، جو ہر مظلوم کے لیے امید اور ہر ظالم کے لیے احتساب کی علامت بنے گا۔ یہ ادارہ صرف نفاذ قانون نہیں بلکہ ایک انقلابی سوچ کا مظہر ہے، جس کا مقصد عوام کو عزت، انصاف اور تحفظ فراہم کرنا ہے

ڈپٹی کمشنر لودھراں ڈاکٹر لبنیٰ نزیر 

 وزیراعلیٰ پنجاب محترمہ مریم نواز شریف کا پنجاب انفورسمنٹ اینڈ ریگولیٹری اتھارٹی (پیرا) کا قیام درحقیقت ایک بصیرت افروز، جراتمندانہ اور عوام دوست اقدام ہے، جو نہ صرف اُن کے ویژن، انتظامی صلاحیت اور عوامی درد مندی کا آئینہ دار ہے بلکہ ایک نئے، منظم اور انصاف پر مبنی پنجاب کی بنیاد بھی رکھتا ہے۔ ان کا یہ قدم ثابت کرتا ہے کہ اگر قیادت مخلص ہو، نیت صاف ہو اور عوامی خدمت کو مقصد بنایا جائے تو ناممکن کو ممکن بنایا جا سکتا ہے۔ پیرا جیسے ادارے کا قیام محض ایک انتظامی اصلاح نہیں بلکہ ایک عوامی انقلاب ہے جو پنجاب کے ہر شہری کو تحفظ، انصاف اور باوقار زندگی کی ضمانت فراہم کرے گا۔ مریم نواز شریف کا یہ اقدام نہ صرف پنجاب بلکہ پورے ملک میں گڈ گورننس اور ریاستی عملداری کی ایک قابل تقلید مثال ہے۔  ان کی قیادت میں پنجاب ایک نئے دور میں داخل ہو چکا ہے — ایسا دور جہاں قانون سب کے لیے برابر ہے، جہاں مظلوم کو آواز دی جاتی ہے اور ظالم کو قانون کے کٹہرے میں لایا جاتا ہے۔ ایسے جراتمند اقدامات پر پنجاب کی عوام بجا طور پر وزیراعلیٰ مریم نواز شریف کو خراجِ تحسین پیش کرتی ہے اور اُمید کرتی ہے کہ ان کا یہ عزم اور عمل پورے پاکستان کے لیے رہنمائی کا باعث بنے گا

  ڈپٹی کمشنر ڈاکٹر لبنیٰ نزیر کا کہنا ہے کہ پنجاب انفورسمنٹ اینڈ ریگولیٹری اتھارٹی کے زیر اہتمام انویسٹیگیشن آفیسرز اور انفورسمنٹ آفیسرز کا فزیکل ٹیسٹ بین الاقوامی معیار کے مطابق 100 فیصد شفاف اور میرٹ پر لیا گیا ۔ پیرا انویسٹیگیشن آفیسر کی پوسٹ کیلئے ضلع لودھراں سے تعلق رکھنے والے امیدواروں کی کل تعداد 156 تھی جن میں 133 مرد امیدوار جبکہ 23 خواتین امیدوار شامل تھیں۔  ڈپٹی کمشنر لودھراں نے مزید بتایا کہ پیرا انفورسمنٹ آفسران کے جسمانی ٹیسٹ میں کل 273 اُمیدواروں نے حصہ لیا جن میں 230 مرد امیدوار اور 43 خواتین امیدوار شامل تھیں ۔پیرا قانون کی عملداری کے لیے ضلع لودھراں میں ایک سب ڈویژنل انفورسمنٹ افیسر تعینات کیا گیا ہے جبکہ 3 انفورسمنٹ افسران اور 2 انویسٹیگیشن افسران کی تعیناتی عمل میں لائی گئی ہے جو تربیتی مراحل میں ہیں۔ ضلع بھر میں پیرا کے لیے51 پولیس کانسٹیبل تعینات کیے گئے ہیں۔ پیرا کے تحت ضلع میں تین پیرا اسٹیشن قائم کیے جائیں گے اور ہر تحصیل میں پیرا کا ایک سٹیشن ہو گا ۔ لودھراں میں پیرا کا اسٹیشن اسسٹنٹ کمشنر افس سے ملحقہ زمین پر تعمیر کیا جا رہا ہے

ڈپٹی ڈائریکٹر پبلک ریلیشنز لودھراں نعمان مسعود خان