ایف آئی اے نے بلوچستان سے ریاست مخالف پروپیگنڈا کرنے والے 924 سوشل میڈیا اکاؤنٹس کا سراغ لگالیا
اعلامیے کے مطابق نشاندہی کے بعد اب تک 312 اکاؤنٹس کو بلاک کیا گیا ہے جبکہ ریاست مخالف پروپیگنڈا کرنے والے عناصر کے خلاف 14 انکوائریاں درج کرکے تحقیقات کا آغازکردیا گیا۔
کراچی/ کوئٹہ: وفاقی تحقیقاتی ایجنسی (ایف آئی اے) کے سائبرکرائم ونگ بلوچستان سے ریاست مخالف پروپیگنڈے کرنے والے 924 اکاؤنٹس کی نشاندہی کرلی۔ ایف آئی اے کے کراچی آفس سے جاری بیان میں ترجمان نے بتایا کہ سائبرکرائم ونگ بلوچستان زون کے ڈائریکٹرعمران محمود کی زیر سربراہی سوشل میڈیا پرریاست مخالف پروپیگنڈے میں ملوث عناصر کےخلاف بھرپور کارروائیاں جاری ہیں۔
اعلامیے کے مطابق ڈائریکٹرسائبرکرائم ونگ ویسٹ عمران محمود کو 3 ماہ قبل تعینات کیا گیا تھا، جنہوں نے اپنی تقرری کے بعد سوشل میڈیا اکاؤنٹس کی مانیٹرنگ اورتجزیے کے لیئےخصوصی ٹیم تشکیل دی- ترجمان ایف بی آر کے مطابق گزشتہ 3 ماہ کے دوران، ایف آئی اے سائبر کرائم ونگ بلوچستان نے ریاست مخالف مواد شئیرکرنے میں ملوث 924 سوشل میڈیا اکاؤنٹس کی نشاندہی کی۔ مذکورہ اکاؤنٹس کے حوالے سے پاکستان ٹیلی کمیونیکیشن اتھارٹی کوتفصیلات فراہم کردی گئی ہیں۔ رپورٹ کردہ اکاؤنٹس میں 487 فیس بک ،190ٹک ٹاک، 147 ایکس (ٹوئٹر)، 88 انسٹاگرام اور 12 دیگر ایپلیکیشن کےاکاؤنٹس شامل ہیں۔
اعلامیے کے مطابق نشاندہی کے بعد اب تک 312 اکاؤنٹس کو پی ٹی اے کی جانب سے بلاک کیا گیا ہے جبکہ ریاست مخالف پروپیگنڈا کرنے والے عناصر کے خلاف 14 انکوائریاں درج کرکے تحقیقات کا آغازکردیا گیا۔ علاوہ ازیں ایف آئی اے سائبر کرائم بلوچستان نے 28 مختلف سوشل میڈیا ایپلیکیشنز کی نشاندہی کی ہے،جنہیں ریاست مخالف عناصر کے ذریعے گمنام رابطوں اورپروپیگنڈے کے لیےاستعمال کیا جاسکتا ہے۔ ایف آئی اے کا کہنا ہے کہ ریاست مخالف عناصر کسی قسم کی رعایت کے مستحق نہیں ہیں،ملزمان کی گرفتاری کے لئےتمام تروسائل بروئے کارلائےجائیں گے،ملزمان کی نشاندہی کےلئےجدید ٹیکنالوجی کا استعمال کیا جارہا ہے