غلہ منڈی سے انٹری فیس کو فوری ختم کیا جائے صدر انجمن آڑ ھتیان ملک محمد علیم
غلہ فروشوں اور کسانوں کے مسائل ترجیحی بنیادوں پر حل کیے جائیں ,انجمن آڑ ھتیان کے اجلاس میں متفقہ طور پر قرارداد منظور کی گئی
احمدپور شرقیہ (نامہ نگار )دفتر مارکیٹ کمیٹی میں صدر ملک محمد علیم کی زیر صدارت انجمن آڑ ھتیان کا اہم اجلاس منعقد ہوا۔ اجلاس میں جنرل سیکرٹری طارق محمود، ممبر ملک نعیم، سیکرٹری سید وقار علی شاہ اور دیگر عہدیداران نے شرکت کی۔اجلاس میں غلہ منڈی سے انٹری فیس ختم کرنے کے معاملے پر تفصیلی غور کیا گیا۔
شرکاء کا کہنا تھا کہ انٹری فیس کی وجہ سے غلہ فروشوں اور کسانوں پر اضافی بوجھ پڑ رہا ہے جس سے کاروبار متاثر ہو رہا ہے۔صدرملک محمد علیم نے کہا کہ غلہ فروشوں اور کسانوں کے مسائل ترجیحی بنیادوں پر حل کیے جائیں گے اور انٹری فیس کے خاتمے کے لیے اعلیٰ حکام سے فوری رابطہ کیا جائے گا۔اجلاس کے آخر میں متفقہ طور پر قرارداد منظور کی گئی کہ انٹری فیس کو فوری ختم کیا جائے۔ مقررین نے خبردار کیا کہ اگر مطالبات تسلیم نہ کیے گئے تو بھرپور احتجاج کیا جائے گا۔