طارق بشیر چیمہ اور میرے حق الیکشن ٹریبونل کی جانب سے آنے والا فیصلہ حق و سچ کی فتح ہے حسن عسکری شیخ

مجھے اور چوہدری طارق بشیر چیمہ کو عوام سے بھرپور پزیرائی ملی اور ہماری فتح ہوئی جس کو آج بھی الیکشن ٹریبونل نے برقرار رکھا صوبائی پارلیمانی سیکرٹری پنجاب و ایم پی اے

چنی گوٹھ (نامہ نگار) صوبائی پارلیمانی سیکرٹری پنجاب و ایم پی اے حسن عسکری شیخ نے کہا ہے کہ سابق وفاقی وزیر و ایم این اے چوہدری طارق بشیر چیمہ اور میرے حق الیکشن ٹریبونل کی جانب سے آنے والا فیصلہ حق و سچ کی فتح ہے ، ان خیالات کا اظہار انہوں نے گزشتہ روز صحافیوں سے خصوصی گفتگو کرتے ہوئے کیا ، انہوں نے کہا کہ ہمارے سیاسی مخالفین نے ہمارے اوپر الزامات لگائے تھے کہ ہم جعلسازی کر کے جیتے ہیں جن کو الیکشن ٹریبونل بہاولپور نے اپنے فیصلے میں مسترد کرتے ہوئے ہمارے حق میں فیصلہ سنا دیا ہے ، انہوں نے کہا کہ مجھے اور چوہدری طارق بشیر چیمہ کو عوام سے بھرپور پزیرائی ملی اور ہماری فتح ہوئی جس کو آج بھی الیکشن ٹریبونل نے برقرار رکھا ،

حسن عسکری شیخ نے کہا کہ ہم نے خاطر خواہ ترقیاتی کام کر کے پسی ہوئی عوام کو دلدل سے نکال دیا ہے ، انہوں نے کہا کہ حلقہ این اے 165 اور پی پی 248 میں جتنے ترقیاتی کام ہو رہے ہیں ان کی ماضی میں مثال نہیں ملتی ، انہوں نے کہا آئندہ سال کے لئے بھی ہم نے سالانہ ترقیاتی پروگرام میں بہت سے منصوبہ جات ڈالے ہیں جن میں گرلز ڈگری کالج چنی گوٹھ سر فہرست ہے ، انہوں نے مزید بتایا کہ نئی بستیوں میں بجلی کی فراہمی کے لئے چوہدری طارق بشیر چیمہ نے مرکزی حکومت سے مزید 15 کروڑ روپے کے فنڈز جاری کرا دئیے ہیں ۔