نیشنل پریس کلب اسلام آباد کے انتخابات ڈاکٹر سعدیہ کمال اور مطیع اللہ جان کے گروپوں میں انتخابی اتحاد قائم ہو گیا
معروف صحافی مطیع اللہ جان نے ڈاکٹر سعدیہ کمال کے ہمراہ مشترکہ پریس کانفرنس میں اپنے جا گو گروپ کا ڈاکٹر سعدیہ کمال کے ہمراہ انتخابی اتحاد اور بطور صدارتی امیدوار اُنکی حمایت کے اعلانات کئے
پاکستان فیڈرل یونین آف جرنلسٹس ورکرز کی مرکزی صدر ڈاکٹر سعدیہ کمال کا نیشنل پریس کلب اسلام آباد کے انتخابی معرکہ میں شکیل قرار اور افضل بٹ گروپوں سے مقابلہ ہو گا
اسلام آباد( سٹاف رپورٹر) نیشنل پریس کلب اسلام آباد کے انتخابات میں دختر احمد پور شرقیہ ڈاکٹر سعدیہ کمال صدارت کا الیکشن لڑنے کے لیے خم ٹھونک کر میدان میں آگئیں -ان کے بیدار گروپ اور معروف اینکر پرسن اور یوٹیوبر مطیع اللہ جان کے جاگو گروپ کے مابین آج انتخابی اتحاد ہو گیا- مطیع اللہ جان اور ڈاکٹر سعدیہ کمال نے مشترکہ نیوز کانفرنس سے خطاب کیا جس میں مطیع اللہ جان نے صدارتی امیدوار ڈاکٹر سعدیہ کمال کی بھرپور حمایت کا اعلان کیا- مطیع اللہ جان کے جاگو گروپ کے امیدوار وسیم عباس ڈاکٹر سعدیہ کمال کے پینل میں جنرل سیکرٹری کے عہدے کیلئے قسمت آزمائی کریں گے -خیال رہے کہ ڈاکٹر سعدیہ کمال ماضی میں نیشنل پریس کلب اسلام آباد کی سینیئر نائب صدر منتخب ہو چکی ہیں ان دنوں وہ پاکستان فیڈرل یونین آف جرنلسٹس ورکرز کی صدر صدر ہیں ان کا مقابلہ سابق صدر شکیل قرار اور افضل بٹ گروپوں سے ہوگا-