تحصیل امن کمیٹی و لائسنس ہولڈرز کا اجلاس اسسٹنٹ کمشنر محترمہ اقرا ناصر اور ڈی ایس پی محمد جاوید اختر کی بھی شرکت
اجلاس میں محرم کے روایتی جلوسوں اور مجالس کے پر امن انعقاد کے لئے درکار انتظامات پر جامع مشاورت کی گئی ڈپٹی کمشنر نے متعلقہ حکام کو ہدایات جاری کیں
احمد پور شرقیہ : ڈپٹی کمشنر بہاولپور سید حسن رضاکی زیرِ صدارت تحصیل امن کمیٹی کے اراکین اور لائسنس ہولڈرز کا اہم اجلاس منعقد ہوا، جس میں اسسٹنٹ کمشنر محترمہ اقراء ناصر اور ڈی ایس پی محمد جاوید اختر چوہدری، سمیت متعلقہ محکموں کے افسران نے شرکت کی۔
اجلاس میں محرم الحرام کے دوران امن و امان کی صورتحال، جلوسوں اور مجالس کے انتظامات، سیکیورٹی پلان، ٹریفک مینجمنٹ، صفائی ستھرائی اور دیگر انتظامی امور کا تفصیلی جائزہ لیا گیا۔ اجلاس کے دوران شرکاء کی آراء، تجاویز اور مسائل کو تفصیل سے سنا گیا جبکہ محرم الحرام کے روایتی جلوسوں اور مجالس کے پرامن انعقاد کے لیے درکار انتظامات پر جامع مشاورت کی گئی۔
ڈپٹی کمشنر بہاولپور سید حسن رضانے متعلقہ محکموں کو ہدایت کی کہ تمام انتظامات بروقت مکمل کیے جائیں اور عزاداران کو ہر ممکن سہولیات کی فراہمی یقینی بنائی جائے۔ اجلاس میں اس عزم کا اعادہ کیا گیا کہ محرم الحرام کے دوران امن، مذہبی ہم آہنگی اور بھائی چارے کی فضا کو برقرار رکھنے کے لیے تمام دستیاب وسائل بروئے کار لائے جائیں گے اور ضابطۂ اخلاق پر مکمل عملدرآمد یقینی بنایا جائے گا تاکہ تمام جلوس اور مجالس پرامن اور منظم انداز میں منعقد ہو سکیں۔