اسسٹنٹ کمشنر نوید حیدر ناجائز قابضین کو بے دخل کریں اور پراپرٹیز کا قبضہ اصل مالکان کے حوالے کیا جائے
ڈپٹی کمشنر بہاولپور ڈاکٹر فرحان فاروق کی اسسٹنٹ کمشنر احمد پور شرقیہ کو ہدایت ,ڈسٹرکٹ ڈسپیوٹ ریزولیشن کمیٹی کا مسلسل تیسرے روز اجلاس
ڈپٹی کمشنر ڈاکٹر فرحان فاروق اور ڈی پی او محمد حسن اقبال نے فریقین کو سنا51 درخواستوں پر سماعت کی اصل حقداران کو قبضہ دلوانے کے احکامات جاری کیے
بہاول پور:29/ نومبر:ڈسٹرکٹ ڈسپیوٹ ریزولیشن کمیٹی کا مسلسل تیسرے روز اجلاس، ڈپٹی کمشنر بہاولپور ڈاکٹر فرحان فاروق اور ڈی پی او محمد حسن اقبال نے فریقین کو سنا51 درخواستوں پر سماعت کی گئی اور قبضہ ختم کرانے، اصل حقداران کو قبضہ دلوانے کے احکامات جاری کیے گئے۔ڈپٹی کمشنر بہاولپور ڈاکٹر فرحان فاروق نے اسسٹنٹ کمشنر احمد پور شرقیہ نوید حیدر کو ہدایت کی کہ وہ کارروائی کرتے ہوئے ناجائز قابضین کو بے دخل کریں اور پراپرٹیز کا قبضہ اصل مالکان کے حوالے کیا جائے۔
انہوں نے کہا کہ وزیرِاعلیٰ پنجاب مریم نواز شریف کے ویژن کے مطابق شہریوں کے مسائل کے فوری حل اور جائیداد کے تحفظ کے لیے قائم ڈسٹرکٹ ڈسپیوٹ ریزولوشن کمیٹی بہاولپورفعال اور مؤثر فورم کے طور پر کام جاری رکھے ہوئے ہے۔اجلاس میں قبضہ، ملکیت اور ریکارڈ سے متعلق موصولہ درخواستوں پر فریقین کے مؤقف سنے گئے، جبکہ اسسٹنٹ کمشنر، اور ریونیو افسران نے ہر کیس کے متعلق حقائق پر مبنی رپورٹس کمیٹی کے سامنے پیش کیں۔ مزید برآں،ڈسٹرکٹ ڈسپیوٹ ریزولیشن کمیٹی نے ناجائز قبضوں سے متعلق شکایات کے فوری اندراج کے لیے خصوصی سیل قائم کرنے اور آن لائن درخواستوں کی وصولی کے لیے سافٹ ویئر تیار کرنے کا فیصلہ کیا ہے، تاکہ شہریوں کی رسائی اور شنوائی مزید مؤثر بنائی جاسکے۔
ڈپٹی کمشنر نے اجلاس کے شرکاء کو واضح ہدایات جاری کیں کہ یہ فورم انصاف کا فورم ہے یہاں کسی کی حق تلفی نہیں ہونے دی جائے گی۔ مستقبل میں شہری پراپرٹیز کی خرید و فروخت میں خود بھی کاغذات کی جانچ پڑتال کریں تاکہ جعلسازی، فراڈ جیسے نقصانات سے محفوظ رہیں۔ فراڈ میں ملوث عناصر کو بھی قانون کی گرفت میں لایا جائے گا۔ اس موقع پر شہریوں کا کہنا ہے حکومت پنجاب کی طرف سے بنائے گئے نئے قانون ”پنجاب پروٹیکشن آف اونرشپ آف ایمووایبل پراپرٹیز آرڈیننس 2025“ شہریوں کی جائیداد کے تحفظ، فوری انصاف کی فراہمی اور ناجائز قبضوں کے خاتمے کے لیے ایک موثر اور فعال قانونی فورم ثابت ہو رہا ہے۔
٭٭٭