مریم نواز کا رحیم یار خان میں پولیس چوکی پرحملے میں 5 ایلیٹ فورس جوانوں کی شہادت پراظہار افسوس
کچے کے ڈاکوؤں کے خلاف آپریشن کو انجام تک پہنچانے کیلئے پر عزم ہیں، جرائم پیشہ عناصر کیخلاف آپریشن جاری رہے گا
پنجاب پولیس کے جوانوں نے جانوں کا نذرانہ دے کر عوام کی حفاظت کا حق ادا کیا، شہدا کے خاندانوں کو تنہا نہیں چھوڑا جائے گا حکومت ہمیشہ ساتھ ہے وزیر اعلیٰ پنجاب
لاہوریکم اگست:…… وزیر اعلیٰ پنجاب مریم نواز شریف نے رحیم یار خان کے علاقے شیخانی پولیس چوکی پر کچے کے ڈاکوؤں کے حملے میں 5 ایلیٹ فورس جوانوں کی شہادت پر گہرے دکھ کا اظہار کیا ہے۔ وزیر اعلیٰ مریم نواز شریف نے رحیم یار خان میں شہید اہلکاروں کی قربانی کو خراجِ عقیدت پیش کیا ہے۔ وزیر اعلیٰ مریم نواز شریف نے شہید اہلکاروں محمد عرفان، محمد سلیم، نخیل، خلیل اور غضنفر کے اہلِ خانہ سے ہمدردی اور تعزیت کا اظہار کیا ہے۔ وزیراعلیٰ مریم نواز شریف نے کہا کہ کچے کے ڈاکوؤں کے خلاف آپریشن کو انجام تک پہنچانے کے لئے پر عزم ہیں۔ دہشت گردوں اور جرائم پیشہ عناصر کے خلاف آپریشن پوری قوت سے جاری رہے گا۔وزیراعلیٰ مریم نواز شریف نے کہا کہ پنجاب پولیس کے جوانوں نے جانوں کا نذرانہ دے کر عوام کی حفاظت کا حق ادا کیا۔پولیس شہدا کے خاندانوں کو تنہا نہیں چھوڑا جائے گا،حکومت پنجاب ہمیشہ ساتھ ہے۔