کامن ویلتھ جرنلسٹس ایسوسی ایشن نے روزنامہ نوائے احمد پور شرقیہ کو جرنلسٹس الائنس پاکستان کے بانی کے طور پر تسلیم کر لیا
عالمی صحافتی ادارے نے اپنی ویب سائٹ پر شائع رپورٹ میں ترمیم کرتے ہوئے روزنامہ نوائے احمد پور شرقیہ اور رورل میڈیا نیٹ ورک پاکستان کو جرنلسٹس الائنس پاکستان کے بانی اداروں کے طور پر نامزد کر دیا
کامن ویلتھ جرنلسٹس ایسوسی ایشن نے اپنی سرکاری ویب سائٹ پر شائع اس رپورٹ میں، جس میں جرنلسٹس الائنس پاکستان کے قیام اور اس کے منشور کو نمایاں کیا گیا تھا، ترمیم کرتے ہوئے واضح کیا ہے کہ یہ نئی تنظیم گزشتہ برس اکتوبر میں احمد پور شرقیہ میں منعقدہ ایک اجلاس میں روزنامہ نوائے احمد پور شرقیہ اور رورل میڈیا نیٹ ورک پاکستان کے زیرِ اہتمام تشکیل دی گئی۔
رپورٹ کے ابتدائی نسخے میں محض "علاقائی میڈیا” کا حوالہ دیا گیا تھا، تاہم بعد ازاں کامن ویلتھ جرنلسٹس ایسوسی ایشن کے ویب ایڈیٹر مارٹن نے متن میں ترمیم کرتے ہوئے روزنامہ نوائے احمد پور شرقیہ کا نام واضح طور پر شامل کیا۔
روزنامہ نوائے احمد پور شرقیہ کے ایڈیٹر اعجاز احمدخان نے، جو کامن ویلتھ جرنلسٹس ایسوسی ایشن کی جانب سے موصول ہونے والی ای میل کے ذریعے ادارے سے رابطے میں ہیں، مارٹن کا اس اہم اصلاح پر شکریہ ادا کیا۔ روزنامہ نوائے احمد پور شرقیہ کے بانی و ایڈیٹر انچیف احسان احمد سحر نے واضح کیا کہ ادارے کو رورل میڈیا نیٹ ورک پاکستان کے ساتھ مشترکہ طور پر نامزد کیے جانے پر کوئی اعتراض نہیں، کیونکہ رورل میڈیا نیٹ ورک پاکستان بھی جنوری 2004 میں روزنامہ نوائے احمد پور شرقیہ ہی کے زیرِ اہتمام قائم کیا گیا تھا۔
صحافتی حلقوں کے مطابق کامن ویلتھ جرنلسٹس ایسوسی ایشن جیسے بین الاقوامی ادارے کی جانب سے دو مقامی اداروں کو باضابطہ طور پر بانی تسلیم کرنا جنوبی پنجاب کے علاقائی صحافتی اداروں کے لیے ایک اہم بین الاقوامی اعتراف ہے۔