وزیراعلیٰ محمود خان کا وفاقی حکومت کیخلاف طاقت کے استعمال کا اعلان

وزیراعلیٰ خیبرپختونخوا محمود خان نے سابق وزیراعظم و پاکستان تحریک انصاف کے چیئرمین عمران خان کی آئندہ لانگ مارچ کی کال پر صوبے کی فورس استعمال کرنے کی دھمکی دے دی

پشاور میں تقریب سے خطاب میں محمود خان کا کہنا تھاکہ امپورٹڈ حکومت نے جو کیا ہے اس کا بدلہ ضرور لیں گے، آج لیگل ٹیم کو بلایا تھا، ان سے مشاورت کی ہے، وفاقی حکومت کے خلاف سپریم کورٹ میں کیس دائر کروں گا۔

 کارکنوں کی شہادت کیخلاف قتل کا مقدمہ درج کرائیں گے۔

انہوں نے مزید کہا کہ پہلے مارچ میں غیر مسلح گئے تھے، خان صاحب مارچ کا اعلان کرینگے تو خیبرپختونخوا کی فورس استعمال کرونگا، شہباز شریف مینٹل کیس ہے، بشام میں وہ اپنے کپڑے فروخت کرنا چاہتا تھا، چوری کے کپڑے کوئی نہیں خریدتا، وزیراعظم کو الٹی میٹم دے رہا ہوں کہ کے پی کا حق چھین کر رہیں گے، وفاقی حکومت کے خلاف مقدمات درج کرینگے۔