چیئرمین سینیٹ یوسف رضا گیلانی کادورہ اوچ شریف ،حضرت محبوب سبحانی کے مزار پر حاضری
خاندان گیلانی ملتان،خاندان گیلانی اوچ شریف اور خاندان گیلانی جمالدین والی نےسابق ایم این اے سید علی حسن گیلانی کی وفات پرتعزیت کی
سید علی حسن گیلانی کا انتقال گیلانی خاندان اور اہل اوچ کے لیے ایک ناقابل تلافی نقصان ہے ۔ سید یوسف رضا گیلانی
بہاولپور۔ 03 دسمبر (اے پی پی):چیئرمین سینیٹ سید یوسف رضا گیلانی نے منگل کو اوچ شریف میں حضرت محبوب سبحانی کے مزار پر حاضری دی،فاتحہ خوانی کی اور پھولوں کی چادر چڑھائی۔ انہوں نے اپنے خاندان کے دیگر بزرگوں کے مزارات پر حاضری دی ۔ خاندان گیلانی ملتان،خاندان گیلانی اوچ شریف اور خاندان گیلانی جمالدین والی نےسابق ایم این اے سید علی حسن گیلانی کی وفات پرتعزیت اور ان کے بھتیجے سید غوث معین الدین گیلانی کی دستار بندی کی۔ اس موقعہ پرچیئرمین سینیٹ سید یوسف رضا گیلانی، سابق گورنر پنجاب مخدوم احمد محمود، سید افتخار الحسن گیلانی، سید احمد مجتبی گیلانی ،سجادہ نشین حضرت موسی پاک شہید ابوالحسن جمال الدین گیلانی، ایم این اے سید سمیع الحسن گیلانی، پیر کوٹ مٹھن شریف عامر کوریجہ، سید سہیل گیلانی اور دیگرموجود تھے۔
چیئرمین سینیٹ سید یوسف رضا گیلانی نے سابق گورنر پنجاب مخدوم احمد محمود کے ہمراہ مرحوم سابق ایم این اے سید علی حسن گیلانی کے اہل خانہ، چچا سید ظفر حسن گیلانی، ان کے بھائی ایم این اے سید سمیع الحسن گیلانی, کزن ایم پی اےسید عامر علی شاہ گیلانی اور مخدوم سید سہیل گیلانی سےاظہار تعزیت کیا۔ چیئرمین سینیٹ نے کہا کہ سید علی حسن گیلانی کی اہل علاقہ کے لئے خدمات ہمیشہ یاد رکھی جائیں گی۔ انہوں نے ان خیالات کا اظہار سابق ایم این اے سید علی حسن گیلانی کے گھر اوچ شریف کےدورے کے دوران کیا۔ چیئرمین سینیٹ نے کہا کہ مرحوم ایک مہربان اور رحم دل شخص تھے۔ ان کا انتقال گیلانی خاندان اور اہل اوچ کے لیے ایک ناقابل تلافی نقصان ہے ۔ سید یوسف رضا گیلانی نے مرحوم کے لیے دعا کی اور سوگوار خاندان سے ہمدردی کا اظہار کیا۔ سید ہادی گیلانی، سابق ایم پی اے شاہ رخ ملک، ڈپٹی کمشنر بہاولپور فرحان فاروق، ڈسٹرکٹ پولیس آفیسر بہاولپور اسد سرفراز، اسسٹنٹ کمشنر احمدپور شرقیہ نوید حیدر، حبیب خان گوپانگ، دیوان تقی، اور علاقے کے دیگر معززین بھی اس موقع پر موجود تھے