ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز کے انتخابات، اظہر عباس صدر اور طارق محمود جنرل سیکریٹری منتخب

 ایمنڈ کی جنرل کونسل نے آزادیٔ صحافت کی بگڑتی ہوئی صورتِ حال اور آزاد صحافت کو محدود کرنے کے لیے حکومتی اختیارات اور ریاستی اداروں کے بڑھتے ہوئے استعمال پر شدید تشویش کا اظہار کیا

بہاول پور کے علاقے نورپورنورنگا سے تعلق رکھنے والے صحافی حسنین خواجہ بھی ایمنڈ ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز کے ایگزیکٹوکمیٹی کے رکن منتخب ہوگئے

لاہور: ایسوسی ایشن آف الیکٹرانک میڈیا ایڈیٹرز اینڈ نیوز ڈائریکٹرز (ایمنڈ) کے انتخابات میں اظہر عباس صدر اور طارق محمود جنرل سیکریٹری منتخب ہو گئے ہیں۔ انتخابی نتائج کے مطابق محمد عثمان اور میاں طاہر نائب صدور، ریحان احمد اور ندیم جمال جوائنٹ سیکریٹریز جبکہ شہاب محمود فنانس سیکریٹری منتخب ہوئے۔

ایمنڈ کی جنرل کونسل کے کراچی ،لاہور اور اسلام آباد میں ہونے والے اجلاس میں ایگزیکٹو کمیٹی کے دیگر اراکین کا بھی انتخاب کیا، جن میں زاہد مظہر، معصوم رضوی، حسنین خواجہ،محسن رضا، مبارک علی، کامران لاشاری، ہمایوں سلیم اور محمد نوشاداور رزاق سروہی شامل ہیں

ایمنڈ کی جنرل کونسل نے پاکستان میں آزادیٔ صحافت کی بگڑتی ہوئی صورتِ حال اور آزاد صحافت کو محدود کرنے کے لیے حکومتی اختیارات اور ریاستی اداروں کے بڑھتے ہوئے استعمال پر شدید تشویش کا اظہار کیا۔ جنرل کونسل نے پیکا (PECA) کے بے جا استعمال اور نیشنل سائبر کرائم انویسٹی گیشن ایجنسی (این سی سی آئی اے) کی کارروائیوں پر بھی تشویش ظاہر کی کونسل نے بعض یوٹیوبرز کے غیر ذمہ دارانہ طرزِ عمل کو صحافت کی آڑ میں ذاتی یا سیاسی ایجنڈے کے فروغ سے تعبیر کیاتاہم تنظیم نے واضح کیا کہ چند افراد کو بنیاد بنا کر پورے میڈیا پر پابندیاں عائد کرنے کا کوئی جواز نہیں ہے۔ ایمنڈ کی جنرل کونسل نے فیصلہ کیا کہ نئی ایگزیکٹو کمیٹی کے اجلاس میں ملک کی مجموعی میڈیا صورتِ حال پر تفصیلی غور و خوض کے بعد اس حوالے سے تنظیم کا مؤقف جاری کیا جائے گا