اسسٹنٹ کمشنر محمد نوید حیدر کی ہدایات کی روشنی میں کچہری روڈ کی دیوار پر جاری آرٹ ورک کا کام مکمل

آرٹ ورک کے ذریعے صفائی، شہری ذمہ داری، اور مثبت سماجی اقدار کو اجاگر کرنے والے پیغامات بھی شامل کیے گئے تاکہ گزرنے والے شہریوں میں شعور بیدار ہو

  احمد پور شرقیہ (نامہ نگار)اسسٹنٹ کمشنر احمد پور شرقیہ محمد نوید حیدر کی ہدایات کی روشنی میں کچہری روڈ پر دیوار پر جاری آرٹ ورک کا کام مکمل  ہو گیا ۔ اس خوبصورتی مہم کے تحت دیواروں پر دلکش اور بامقصد نقش و نگار بنائے گئے جن کا مقصد شہری ماحول کو بہتر بنانا، عوام میں جمالیاتی شعور اجاگر کرنا اور سرکاری املاک کے تحفظ کا احساس پیدا کرنا ہے۔ آرٹ ورک کے ذریعے صفائی، شہری ذمہ داری، اور مثبت سماجی اقدار کو اجاگر کرنے والے پیغامات بھی شامل کیے گئے تاکہ گزرنے والے شہریوں میں شعور بیدار ہو اور وہ اپنے اردگرد کے ماحول کو صاف ستھرا رکھنے میں کردار ادا کریں۔

اس اقدام سے نہ صرف کچہری روڈ کی خوبصورتی میں اضافہ ہوا بلکہ یہ مقام شہریوں کے لیے ایک خوشگوار اور دیدہ زیب منظر پیش کرنے لگا ہے۔ اسسٹنٹ کمشنر نے متعلقہ عملے کو ہدایت کی کہ شہر کے دیگر اہم مقامات پر بھی اسی طرز کی خوبصورتی مہم جاری رکھی جائے، جبکہ دیواروں پر غیر قانونی تشہیر اور وال چاکنگ کے خلاف سخت کارروائی عمل میں لائی جائے۔ انہوں نے اس عزم کا اظہار کیا کہ احمد پور شرقیہ کو صاف، منظم اور خوبصورت شہر بنانے کے لیے انتظامیہ بھرپور اقدامات جاری رکھے گی۔