ڈائریکٹر میوزیم محمد زبیر ربانی نےبہاول پور میوزیم کی گیلریوں کا جائزہ لینے کے موقع پر ڈاکٹر احتشام انور کو میوزیم کے بڑے ہالز اور ان میں گنویری والا سے ملنے والی نوادرات کے مجوزہ ڈسپلے بارے بریف دی۔
بہاول پور:11/ مارچ : گنویری والا کے مقام سے ملنے والی تمام نوادرات کو بہاول پور میوزیم کی مرکزی گیلریوں میں ڈسپلے کیا جائے گا اور ضمن میں تمام اقدامات کو بروئے کار لایا جا رہا ہے۔ ان خیالات کا اظہار چیئرمین بورڈ آف گورنرز بہاولپور میوزیم و کمشنر بہاول پور ڈاکٹر احتشام انور نے آج بہاول پور میوزیم کی گیلریوں کا جائزہ لینے کے موقع پر کیا۔ ڈائریکٹر میوزیم محمد زبیر ربانی نے اس موقع پر ڈاکٹر احتشام انور کو میوزیم کے بڑے ہالز اور ان میں گنویری والا سے ملنے والی نوادرات کے مجوزہ ڈسپلے بارے بریف دی۔ کمشنر بہاول پور ڈویژن نے کہا کہ ہاکڑہ تہذیب کی کھدائی کے بعد خطہ بہاول پور کی اہمیت پہلے سے سہ چند ہو گئی ہے۔ انھوں نے کہا کہ بہاول پور میوزیم میں ان نوادرات کے ڈسپلے سے ملکی و غیر ملکی سیاح، محققین اور وزیٹرز کو ان پر تحقیق کیلئے با آسانی رسائی میسر ہوگی۔ محمد زبیر ربانی نے کہا کہ کمشنر بہاول پور کی ذاتی دلچسپی سے چولستان کے مقام گنویری والا میں تقریباً سات ہزار سال قدیم شہر کے آثار اس کھدائی کی دریافت ہوئے ہیں۔ ان ٹیلوں کے آثار 80 ہیکٹر علاقے پر پھیلے ہوئے ہیں۔ انھوں نے ڈاکٹر احتشام انور کی تاریخ سے وابستگی اور ریاست بہاول پور سے ان کے لگاؤ اور میوزیم کی بہتری کے لیے اٹھائے گئے اقدامات پر ان کو خراج تحسین بھی پیش کیا۔
