محکمہ زراعت (توسیع) کا موضع رشید آباد پر اگیتی کپاس کے حوالے سے میگا سیمینار
مہمان خصوصی ایڈیشنل سیکرٹری ٹاسک فورس ساؤتھ پنجاب عبدالجبار تھے31 مارچ تک پانچ ایکڑ اگیتی کپاس کاشت کرنے پر کاشتکاروں کو 25 ہزار سبسڈی دی جائے گی
احمد پور شرقیہ (اکبر عباسی سے)محکمہ زراعت (توسیع)احمد پور شرقیہ کا موضع رشید آباد ترقی پسند کاشتکار محمد ریاض آرائیں کے ڈیرہ پر اگیتی کپاس کے حوالے سے میگا سیمینار کا انعقاد کیا گیا۔پروگرام کے مہمان خصوصی ایڈیشنل سیکرٹری ٹاسک فورس ساؤتھ پنجاب عبدالجبار تھے۔کسانوں کے میگا سیمینار سے خطاب کرتے ہوئے ایڈیشنل سیکرٹری ٹاسک فورس عبدالجبار نے کہا کہ اگیتی کپاس سے کم خرچے میں زیادہ پیداوار حاصل کی جا سکتی ہے۔ڈائریکٹر زراعت بہاولپور ڈویژن محمد جمیل غوری نے کہا کہ بہاول پور میں اگیتی کپاس کی کاشت کے لیے ڈیڑھ لاکھ ایکڑ کا ٹارگٹ رکھا گیا ہے۔کاشتکار اگیتی کپاس کاشت کر کے زائد ریٹ حاصل کرسکتے ہیں۔
تقریب سے خطاب کرتے ہوئے ڈپٹی ڈائریکٹر زراعت (توسیع) بہاول پور حافظ محمد شفیق کا کہنا تھا کہ کاشتکار تیلدار اجناس کی کاشت کے بعد اگیتی کپاس کاشت کریں۔کپاس کی پروڈکشن ٹیکنالوجی پر بات کرتے ہوئے محمد کامران جبار سینر زراعت آفیسر کا کہنا تھا کہ کاشتکار اگیتی کپاس کے ٹرپل جین ورائٹیز کاانتخاب کریں.اسسٹنٹ ڈائریکٹر زراعت (توسیع)احمد پور شرقیہ راشد سرور نے کاشتکاروں سے خطاب کرتے ہوئے بتایا کہ اگیتی کپاس کی کاشت کو یقینی بنانے کے لیے تمام وسائل بروئے کار لائے جائیں گے۔اس سلسلے میں بھرپور طریقے سے اگیتی کپاس کی مہم چلائی جارہی ہے محکمہ زراعت کی ٹیمیں کاشتکاروں کی رہنمائی کے لیے ہر وقت فیلڈ میں موجود ہیں.31 مارچ تک پانچ ایکڑ اگیتی کپاس کاشت کرنے پر کاشتکاروں کو 25 ہزار سبسڈی دی جائے گی۔میگاسیمینار میں علاقہ کے ڈیڑھ سو سے زائد کاشتکاروں نے شرکت کی۔