اسسٹنٹ کمشنر نوحید حیدر کااوچ شریف کے مرکزی بازار کا اچانک وزٹ تجاوزات کے خلاف بھرپور آپریشن

متعدد دکانداروں نے خود ہی اپنا سامان فٹ پاتھ سے ہٹا لیا، جبکہ کئی جگہوں پر میونسپل عملے نے بھاری مشینری کی مدد سے قبضے ختم کروائے

اوچ شریف (کرائم رپورٹر)  اسسٹنٹ کمشنر احمد پور شرقیہ نوحید حیدر نے گزشتہ روز اوچ شریف کے مرکزی بازار کا اچانک وزٹ کیا، جہاں غیر قانونی تجاوزات، صفائی کی ناقص صورتحال اور عوامی راہداریوں پر قبضے کا سختی سے نوٹس لیا۔ اچانک دورے کی اطلاع ملتے ہی میونسپل کمیٹی کے عملے میں کھلبلی مچ گئی اور فوری طور پر تجاوزات کے خلاف بھرپور آپریشن شروع کر دیا گیا۔اسسٹنٹ کمشنر نے وزٹ کے دوران دکانوں کے آگے رکھے گئے سامان، سڑک پر قائم ریڑھیوں، اور فٹ پاتھوں پر قابض غیر قانونی تعمیرات کو فوری ہٹانے کے احکامات جاری کیے۔ ان کا کہنا تھا کہ "اوچ شریف کے شہریوں کو صاف، کھلا اور پرامن بازار فراہم کرنا ضلعی انتظامیہ کی اولین ترجیح ہے۔ عوام کی سہولت میں رکاوٹ بننے والے عناصر کے خلاف سخت کارروائی کی جائے گی۔

"انہوں نے مزید کہا کہ میونسپل کمیٹی کو ہدایت دی گئی ہے کہ وہ روزانہ کی بنیاد پر نگرانی کو یقینی بنائیں اور بازار کی صفائی اور ترتیب کو برقرار رکھنے کے لیے مستقل اقدامات کریں۔ اس دوران شہریوں اور دکانداروں سے گفتگو کرتے ہوئے انہوں نے تجاوزات کو معاشرتی بد نظمی قرار دیا اور ان کے خاتمے کے لیے عوامی تعاون کو بھی ناگزیر قرار دیا۔اسسٹنٹ کمشنر کی جانب سے سخت کارروائی کے بعد متعدد دکانداروں نے خود ہی اپنا سامان فٹ پاتھ سے ہٹا لیا، جبکہ کئی جگہوں پر میونسپل عملے نے بھاری مشینری کی مدد سے قبضے ختم کروائے۔شہریوں نے انتظامیہ کے اس اقدام کو سراہتے ہوئے کہا کہ اگر ایسے اقدامات تسلسل کے ساتھ جاری رہے تو بازار کا ماحول بہتر ہوگا اور عوام کو آسانی میسر آئے گی۔ دکانداروں سے بھی اپیل کی گئی کہ وہ ضابطہ اخلاق کی پاسداری کریں تاکہ انتظامیہ کو سخت کارروائی نہ کرنا پڑے۔اسسٹ کمشنر احمد پور شرقیہ نوحید حیدر نے کہا کہ ضلعی انتظامیہ نے عندیہ دیا ہے کہ اگلے مرحلے میں شہر کے دیگر علاقوں میں بھی اسی طرز پر آپریشن کیا جائے گا تاکہ غیر قانونی تجاوزات کا مکمل خاتمہ ممکن بنایا جا سکے۔