امیرِ بہاولپور نواب صلاح الدین عباسی کی والدہ محترمہ ہر ہائنس بیگم صاحبہ کا انتقال، عباسیہ بٹالین (بلوچ رجمنٹ) کا اظہارِ تعزیت

لیفٹیننٹ کرنل عرفان اکبر اور جوانوں کی جانب سے لاہور میں تعزیتی مکتوب کی فراہمی، درجاتِ بلندی کے لیے دعا

بہاولپور اسٹیٹ فورسز کی پاک فوج میں ضم ہونے والی عباسیہ بٹالین، جو اب بلوچ رجمنٹ کا حصہ ہے، نے امیرِ بہاولپور نواب صلاح الدین عباسی کی والدہ محترمہ ہر ہائنس بیگم صاحبہ کے انتقال پر گہرے رنج و غم کا اظہار کیا ہے۔

لیفٹیننٹ کرنل عرفان اکبر سمیت بٹالین کے تمام افسران اور جوانوں نے مرحومہ کے لیے دعائے مغفرت اور درجاتِ بلندی کی دعا کی۔ اس سلسلے میں عباسیہ بٹالین کے ایک نمائندے نے ڈیفنس ہاؤسنگ اتھارٹی (ڈی ایچ اے) لاہور میں نواب صلاح الدین عباسی کی اقامت گاہ پر حاضری دی اور تعزیتی خط پیش کیا۔

تعزیتی پیغام میں مرحومہ ہر ہائنس بیگم صاحبہ، زوجہ مرحوم امیرِ بہاولپور نواب محمد عباس خان عباسی، کے لیے خصوصی دعا کی گئی۔ تفصیلات کے مطابق دو روز قبل لیفٹیننٹ کرنل عرفان اکبر نے ولی عہد پرنس بہاول عباس عباسی سے ٹیلیفون پر رابطہ کر کے صادق گڑھ پیلس میں تعزیت کے لیے آنے کی خواہش ظاہر کی، تاہم انہیں بتایا گیا کہ اہلِ خانہ لاہور منتقل ہو چکے ہیں۔

بعد ازاں بٹالین کے ایک نمائندے کو لاہور روانہ کیا گیا، جس نے نواب صلاح الدین عباسی سے ملاقات کر کے بٹالین کی جانب سے تعزیت پیش کی۔ نمائندے نے بتایا کہ بٹالین صحرائی مشقوں میں مصروف تھی اور ہیڈکوارٹر واپسی پر انہیں اس افسوسناک خبر کا علم ہوا۔

یہ امر قابلِ ذکر ہے کہ مرحوم امیرِ بہاولپور نواب محمد عباس خان عباسی اور موجودہ امیرِ بہاولپور نواب صلاح الدین عباسی ماضی میں بہاولپور اسٹیٹ فورسز سے پاک فوج میں ضم ہونے والی مختلف بٹالینز کی تقریبات میں شرکت کرتے رہے ہیں۔